भांगरभूंय | प्रतिनिधी
भांगरभूंय । प्रतिनिधी
पणजीः पर्वरी उड्डाण पुलाच्या कामा खातीर 2 जानेवारी ते 2 मार्च 2026 ओडीपी रस्तो ते दामियान दी गोवा तशेंच कदंब हॉटेल ते ओ कोकेरो जंक्शना मेरेनचो रस्तो येरादारी खातीर बंद आसतलो. ह्या वेळार पर्यायी मार्गान येरादारी वळयतले. उत्तर गोंय जिल्होधिकारी अंकीत यादव हांणी आदेश जारी केलो.
गिरवडे वटेन नवो ओडपी रस्तो ते दामियान दी गोवा आनी पर्वरी वटेन कदंब हॉटेल ते ओ कोकेरो मेरेन ह्या म्हामार्गाचे दोन भाग बंद दवरतले जाल्यार उरिल्ले भागांत येरादारी चालू आसतली. म्हामार्गाच्या कामा खातीर येरादारी बंद दवरल्यार कितें परिणाम जातलो हाचो नियाळ घेवपा खातीर एक दिस येरादारी बंद दवरपाचो निर्णय घेतला.
ह्या काळांत जी जड वाहनां गरजेच्या वस्तुंची येरादारी करतात तांकां खर चडटेक लागून म्हापशें वटनेच्या ओडीपी रस्त्याचेर वचपाक शक्य जावचे ना. देखून अस्तिवात आशिल्ल्या रस्त्याचेर एक लेन उक्ती दवरुन तांकां म्हापशें ते पणजी प्रवास करपाक मेकळीक दिल्या.
तशेंच येरादारी घुंवडावपा खातीर जे रस्ते प्रस्तावीत केल्यात ते येरादारी करपाचे स्थितींत आशचे आनी पुराय रस्तो भर उजावाडाची वेवस्था करची. तशेंच रस्त्या कुशीची झुडपा काडून उडोवची आनी रस्त्या वयल्या लायटींच्या वायरींची उंचाय सारखी आसा काय ना हे सुनिश्चित करचे, अशे निर्देश आदेशात दिला.
ह्या दिसा सकाळच्या वेळार उड्डाण पुलाचे सेगमेंटाची येरादारी करपाक मेळची ना. तशेंच आपतकालीन वाहना जशें की एम्ब्युलन्स, फायर ब्रिगेड हांका यो-वच करपा खातीर तशेंच जर येरादारीची गच्चमुडी समजा जाली जाल्यार दोनूय वटेन समर्पित लेनीचो बंदोबस्त करचो. तशेंच येरादारी पुलिसां कडेन मनीस बळाचेर निर्बंध आशिल्ले कारणान कंत्राटादरान दोनूय पोयंटाचेर कमीत कमी 2 ट्राफिक मार्शल नेमचें. जर मदी मोटार बंद पडटा जाल्यार कंत्राटदारान क्रेन तैनात घालून पर्वरी ट्राफिक सेल निरिक्षकाचे मार्गदर्शना खाला त्यो काडच्यो.
येरादारी पुलिसांच्या सहकार्यान कंत्राटदारन मुखेल वाठारांत युनिफोर्म, रिफ्लेक्टीव्ह जॅकीट आनी दांड्या सयत ट्राफीक मार्शाल तैनात करचे. ट्राफिक सेल पर्वरी वा पर्वरी पुलीस स्टेशना कडल्यान जो मेरेन कळोवणी येना ते मेरेन कंत्राटदारान रस्ते बंद वा येरादारी घुंवडावपाची न्हय. कंत्राटदारान एक सुपरवायजर नियुक्त करून तांचो मोबायल नंबर परवरी ट्रेफीक सेलाचे पुलीस निरिक्षकांक दिवचो, अशी सुचोवणी आदेशात दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
