भांगरभूंय | प्रतिनिधी
पणजी : वर्सुकी 36 कोटी रुपया वर्सुकी आवर्ती शुल्काची थकबाकी आशिल्ल्यान दोन कॅसिनो बेगोबेग बंद करपाचो आदेश जारी जाला. हातूंत हडफडेंचो बिग बी लीजर एलएलपी आनी कलंगूटचो माचोस एंटरटेन्मेंट प्रायव्हेट लिमिटेड हांचो आस्पाव आसा. ह्या आदेशाचे पालन करून पुलीस महासंचालकांक अहवाल सादर करपाची सुचोवणी दिल्या. हे संबंदीचो आदेश गृह खात्याचे अवर सचीव मंथन मनोज नायक हांणी जारी केला.
जारी केल्ल्या आदेशा प्रमाण बिग बी लीजर एलएलपी कंपनी हडफडेंच्या रिओ रिसॉर्टांत कॅसिनो चलयता. ह्या कंपनी कडल्यान 1 एप्रील 2024 ते 31 मार्च 2025 मजगतीचें वर्सुकी आवर्ती शुल्क 3 कोटी रुपया, जाल्यार 1 एप्रील 2025 ते 31 मार्च 2026 ह्या वर्सा खातीरचे 11 कोटी रुपया, दोनूय मेळून वट्ट 14 कोटी रुपया थकीत आसा. ‘कारणां दाखयात’ नोटीस दिवन लेगीत थकबाकी फारीक करूंक नाशिल्ल्यान गृह खात्यान हो कॅसिनो बेगोबेग बंद करपाचो आदेश जारी केला. ते भायर सात दिसां भितर 18 टक्के कळंतरा सयत ही थकबाकी फारीक करपाचो आदेशूय दिला.
कळंगूटे माचोस एंटरटेनमेंट प्रायव्हेट लिमिटेड वतीन एक कॅसिनो चलता. हे कंपनीन 1 एप्रील 2025 ते 31 मार्च 2026 ह्या वर्सा खातीरचे 22 कोटी रुपया वर्सुकी आवर्ती शुल्क भरूंक ना. कारणां दाखयात नोटीस दिवन लेगीत थकबाकी आशिल्ली रक्कम जमा करूंक नाशिल्ल्यान गृह खात्यान कॅसिनो बेगोबेग बंद करपाचो आदेश जारी केला. ते भायर थकीत रक्कम 18 टक्के कळंतरा सयत सात दिसां भितर जमा करपाचो आदेश दिला. मजगतीं, हे संबंदीचे आदेशाची अंमलबजावणी करून कारवाय अहवाल सादर करपाची सुचोवणी पुलीस महासंचालकांक दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
