भांगरभूंय | प्रतिनिधी
-पुराभिलेख खात्याच्या कार्यालयांत मेळटले दाखले
पणजी : पुराभिलेख खात्यान आल्तिनो कार्यालयांत 1914 वर्सा आदले जल्म तशेंच मरणाचे दाखले दिवपाची वेवस्था केल्या. 1914 वर्सा पयलीचे दाखले ऑनलायन उपलब्ध करपाची वेवस्था जातली. डिजीटायजेशनाचो वावर पुराय जाले उपरांत ही वेवस्था जातली, अशी म्हायती पुरातत्व खात्याचे संचालक रोहीत कदम हांणी दिली.
पुराभिलेख, पुरातत्व खात्याचे कार्यालय पयलीं मळा – पणजी आशिल्लें. आतां ते कदंब पठाराचेर स्थलांतरीत केलां. पयलीं जल्म, मरणाची कागदपत्रां मळां तशेंच आल्तिनो वयल्या कार्यालयांत आशिल्लीं. हाका लागून जल्म, मरणाचे दाखले मेळोवपाक लोकांक मळा तशेंच आल्तिनो वयल्या कार्यालयांत खेपो मारच्यो पडटाल्यो. आल्तिनो कार्यालयांत कागदपत्र मेळ्ळी ना, जाल्यार तांकां मळा कार्यालयांत सोदपाक येवचे पडटाले. आतां जल्म, मरणाची सगलीं कागदपत्रां आल्तिनो कार्यालयांत स्थलांतरीत केल्यात. तशेंच तांचे योग्य प्रकारान वर्गीकरण केलां. हाका लागून 1914 वर्सा पयलीचें जल्म, लग्न आनी मरणाचे दाखले मेळप सोंपें जातलें. हे विशींची अधिसुचोवणी जारी जाल्या. तशेंच 1914 ते 1970 मेरेन बंदर कप्तान तशेंच स्थलांतरणा विशींचीं कागदपत्रां उपलब्ध आसात.
सध्या तरी 1914 वर्सा पयलींचीं सगलीं कागदपत्रां ऑनलायन उपलब्ध जायनात. दाखले तशेंच कागदपत्रांचें डिजीटायजेशन करपाचो वावर सुरू आसा. डिजीटायजेशनाची प्रक्रिया सुरू आसा. ही प्रक्रिया पुराय जाले उपरांत ऑनलायन दाखले मेळपाची वेवस्था जातली, अशी म्हायती पुराभिलेख, पुरातत्व खात्याचे संचालक रोहीत कदम हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
