भांगरभूंय | प्रतिनिधी
वर्साक सरासरी 34 जाल्यार म्हयन्याक तीन बायलांक लागण
भांगरभूंय । प्रतिनिधी
पणजीः 2003 ते 2023 ह्या 19 वर्सांत वट्ट 650 गुरवार बायलांक एचआयव्हीची लागण जाल्ली. म्हणल्यारूच वर्साक सरासरी 34, जाल्यार म्हयन्याक तीन गुरवार बायलांक एचआयव्हीची लागण जाल्ली. अशें आसलें तरीय 2022 आनी 2023 त गोंयांत एकेय एचआयव्ही बाधीत गुरवार बायले कडल्यान अर्भकाक संक्रमण जावंक ना.
एड्स नियंत्रण संस्थेच्या अहवाला प्रमाण गोंयांत गुरवार बायले कडल्यान अर्भकाक एचआयव्ही संक्रमम जावपाचें प्रमाण 4 ते 7 टक्के आसा. हें प्रमाण उणें आसलें तरीय एचआयव्ही संक्रमणाच्या मुख्य कारणां मदलें एक आसा. देशांत हाचें प्रमाण सादारणपणान 8 टक्के आसा. हे खातीर 2002 त गोंया सयत पुराय देशांत पीपीटीसीटी हो प्रकल्प सुरू केल्लो.
ह्या प्रकल्पांत गुरवार बायले पसून अर्भकाक वा नव्याच जल्माक आयिल्ल्या भुरग्याक एचआयव्हीची लागण जावची न्हय हे खातीर गुरवार बायलांचेर उपचार आनी समुपदेशन करतात. गोंयचो विचार केल्यार 2003 ते 2021 मेरेन ह्या प्रकल्पा खाला सुमार 2 लाख 40 हजार गुरवार बायलांची नोंदणी केल्ली. तातूंतल्या 2 लाख 10 हजार बायलांची तपासणी केल्ली. तातूंतल्या 650 मदल्या 526 जाणांच्या भुरग्यांक एचआयव्हीची लागण जाल्ली. तातूंतल्या 480 भुरग्यांचेर एनव्हीपी पद्दतीन वखद- विर्सद केल्लें. वट्ट एचआयव्ही बाधीत गुरवार बायलां मदल्या 306 जाणांच्या जोडीदाराक लेगीत एचआयव्हीची लागण जाल्ल्याचें तपासणेंत निश्पन्न जाल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
