भांगरभूंय | प्रतिनिधी
वट्ट 5,038 उमेदवार वेंचणूक रिंगणांत
भांगरभूंय I प्रतिनिधी
पणजी : पंचायत प्रतिनिधींची निवड करपा खातीर राज्यांतल्या 186 पंचायतींनी आयज मतदान जातलें. मतदानपत्रिका तशेंच हेर साहित्य मतदान केंद्रांनी पावोवपाचें काम पुराय जालां. तशेंच मतदानाची सगली तयारी पुराय जाल्या, अशी म्हायती राज्य वेंचणूक आयोगाच्या गोपांनी दिली. 12 ऑगस्टाक मतमेजणी जावन निकाल जाहीर जातले.
मतदान केंद्रांचेर कर्मचाऱ्यां सयत पुलिसांची वेवस्था आसतली. मतदाना वेळार गैरप्रकारांक आळो घालपा खातीर वेंचणूक आयोगान घोळट्या पंगडा सयत पुलिसांची वेवस्था केल्या. वेंचणूक कर्मचाऱ्यांनी आदले दिसा मतदान केंद्रांचेर सामानाची पळोवणी करपा सयत हेर तयारेची खात्री केली.
राज्यांतल्या 186 पंचायतींनी 1,464 प्रभागां खातीर मतदान जातलें. 7 लाख 97 हजार 20 मतदार 5,038 उमेदवारांचो फुडार थारायतले. 64 उमेदवार विरोधाविणें वेंचून आयल्यात. वट्ट 1,517 मतदान केंद्रांतल्यान 45 मतदान केंद्रां संवेदनशील आसात.
उत्तर गोंयांत 97 पंचायतींनी जाल्यार दक्षीण गोंयांत 89 पंचायतींनी वेंचणूक जाता. उत्तर गोंयांतल्या 97 पंचायतींनी 742 प्रभाग आसात, जाल्यार 3 लाख 85 हजार 867 मतदार आसात. उत्तर गोंयांत 2,667 उमेदवार रिंगणांत आसात. हातूंतले 41 उमेदवार विरोधाविणें वेंचून आयल्यात. उत्तर गोंयांत लेगीत दादल्यां परस बायलां मतदारांचो आंकडो चड आसा. 1 लाख 87 हजार 791 दादले मतदार आसात, जाल्यार 1 लाख 98 हजार 75 बायलां मतदार आसात. उत्तर गोंयांत 765 मतदान केंद्रां आसात.
दक्षीण गोंयांत 89 पंचायतींनी 722 प्रभागां खातीर वेंचणूक जातली. दक्षीण गोंयांत बायलां मतदारांचो आंकडो 2 लाख 11 हजार 943 आसा जाल्यार दादले मतदारांचो आंकडो 1 लाख 99 हजार 210 आसा. 752 मतदान केंद्रांतल्यान 18 केंद्रां संवेदनशील आसात. 2,371 उमेदवारांतल्यान 23 उमेदवार विरोधाविणें वेंचून आयल्यात.
उत्तर गोंयांत पेडणें, सत्तरी, दिवचल, बार्देस आनी तिसवाडी म्हालांचो आस्पाव जाता. दक्षीण गोंयांत फोंडें, साश्ट, सांगें, धारबांदोडें, काणकोण, केपें आनी मुरगांव म्हालांचो आस्पाव आसा.
उसगांवां पयशे वांटिल्ल्याचो आरोप
उसगांव पंचायतीच्या प्रभाग चार मदीं पयशे वाटिल्ल्याचो अारोप जाला. घोळट्या पुलीस पंगडा कडेन कागाळ आयले उपरांत पुलिसांनी घडणूक थळाक भेट दिवन पळोवणी केली.
कोरोना दुयेंतींनी मतदान करपाचो वेळ सांजे 4 ते 5
राज्यांत फाटल्या कांय दिसा पसून परतून एकदा कोरोना दुयेंती मेळत आसात. सध्याचे स्थितींत 900 परस चड सक्रीय दुयेंती आसात. कोरोना बादीत मतदारांक मतदान करपाक मेळचें हे खातीर सांजे 4 ते 5 हो वेळ दिला. ह्या वेळांत कोरोना बादीत मतदारांनी मतदान केंद्राचेर वचून मतदान करचें.
उत्तर गोंयांतल्यान 3, दक्षीणेंतल्यान 6 कागाळींची नोंद
वेंचणूक आचारसंहिता भंगाच्यो जिल्होधिकाऱ्यां कडेन 9 कागाळी आयल्यांत. उत्तर गोंयांतल्यान 3 जाल्यार दक्षीण गोंयांतल्यान 6 कागाळी आयल्यात. उत्तर गोंयांतल्यान पर्वरी, शिवोले आनी मेरशेंतल्यान दरेकी एक कागाळ आयल्या. शिवोले आनी मेरशेंतली कागाळ प्रचारा वेळार पयशे वांटपा विशींची आसा. काणकोण म्हालांतल्यान 2 जाल्यार साश्ट म्हालांतल्यान 4 कागाळी आयल्यात. सगल्या कागाळींचो तपास सुरू आसा, अशी म्हायती जिल्होधिकारी कार्यालया कडल्यान मेळ्ळी.
पंचायती : 186
प्रभाग : 1,464
उमेदवार : 5,038
विरोधाविणें : 64
वट्ट मतदार : 7,97,020
दादले मतदार : 3,87,001
बायलां मतदार : 4,10,018
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
