भांगरभूंय | प्रतिनिधी
नवी दिल्ली, खबरां संस्था ः केंद्रीय पर्यावरण, रान आनी हवामान बदल मंत्रालयान आंतरराष्ट्रीय वाग दिसा निमतान ‘स्टेटस ऑफ स्मॉल कॅट-इन द टायगर लँडस्केप ऑफ इंडिया’ हो अहवाल जाहीर केला. हो अहवाल भारतांतल्या वागांच्या रावपाच्या सुवातींनी मेळपी णव ल्हान रानवटी माजर जातींचो आसा.
हो अभ्यास 2018 आनी 2022 वर्सा केल्ल्या वाग जनगणनेच्या आंकड्यांचेर आदारीत आसा. 2018 ते 2022 ह्या काळांत देशांतल्या 18 राज्यांनी 57 हजारां परस चड कॅमेरा ट्रॅप सुवातींचें सर्वेक्षण केलां. हातूंत ल्हान रानवटी मार्जार कुळांतल्या प्रजातींची वट्ट 24,800 फोटो ट्रॅप केलें. ह्या सगळ्या फोटोंच्या अभ्यासा वयल्यान 17,000 ल्हान रानटी मार्जार कुळांतल्या प्रजातींची वैयक्तीक वळख पटयली. ह्या तपशीलाक लागून संशोधकांक रानमाजर, वाघटी (रस्टी स्पॉटेड कॅट), बिबट माजर (लेपर्ड कॅट), नुस्तें मारपी माजर (फिशिंग कॅट) आनी हेर जातींच्या श्रेणीची मोलावणी करपाची परवानगी मेळ्ळी. हातूंत रानमाजरांची संख्या वाडिल्ली आसून सुमार 96,275 चौखण किलोमीटर इतलो वाठार आसा.
रानमाजर, वाघटी आनी ‘लेपर्ड कॅट’ हांची महाराष्ट्रांत नोंद जाल्या. 1990 च्या दशकांत राज्यांतल्या मेळघाट वाग राखीव वाठारांतय ‘डेझर्ट कॅट’ची नोंद जाली. पूण ही जात आतां राज्यांत दिसना. सह्याद्री वाग राखीव वाठारांत ‘लेपर्ड कॅट’ माजराची रावपाची सुवात वाडल्या अशेंय ह्या अहवाला वरवीं दिसून आयलां.
अशो आसात णव प्रजाती…
ह्या अभ्यासा वरवीं भारतांतल्या वाग राखीव वाठारांतल्यान कॅराकल (शशकर्ण), फिशिंग कॅट (नुस्तेमारी माजर), गोल्डन कॅट (सोनेरी माजर), मारबर्ड कॅट, लेपर्ड कॅट, क्लाऊडेड लेपर्ड, रस्टी स्पोटेड कॅट (वाघटी), वायल्ड कॅट (रान माजर) आनी डेझर्ट कॅट अशा णव प्रजातींची नोंद केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
