भांगरभूंय | प्रतिनिधी
नवी दिल्ली, खबरां संस्थाः विदेशांत वचून शिक्षण घेवपी भारतीय विद्यार्थ्यांचो आंकडो दिसान दीस वाडत आसा. विद्यार्थी विदेशांतल्या अभ्यासक्रमांक प्राधान्य दितात. परराश्ट्र मंत्रालयाच्या (एमईए) ताज्या आंकडेवारी प्रमाण, 2025 त 18 लाखां परस चड भारतीय विद्यार्थी विदेशांत शिकतात. दोन वर्सां आदीं हो आंकडो 13 लाख आशिल्लो.
परराश्ट्र मंत्रालयाच्या 2025 वर्साच्या अहवाला प्रमाण 2025 त भारतीय विद्यार्थ्यां खातीर अमेरिका, कॅनडा आनी ब्रिटन हीं सगळ्यांत चड पसंत आशिल्लीं थळां आसात.
अमेरिका
अमेरिकेंत वट्ट 3,31,602 भारतीय विद्यार्थी शिकतात. अमेरिकेंतल्या विद्यार्थ्यांचो आंकडो 2023- 24 शिक्षणीक वर्सा पसून दर वर्सा 23 टक्क्यांनी वाडला. अमेरिकेंत सगळ्यांत चड शिकपी विद्यार्थी आतां भारतांतले आसात आनी भारतान चीनाक लेगीत फाटीं घालां. शिक्षणा खातीर गेल्ले भुरगे चड करून थंयच नोकरी करतात आनी स्थायीक जातात.
कॅनडा
कॅनडा हो बहुसंस्कृतीक समाज, उच्च दर्जाचें शिक्षण आनी कायम राबितो मेळोवपाक सोंपें आशिल्ल्यान भारतीय विद्यार्थ्यांक सगळ्यांत चड पसंतीचें थळ जाला. परराश्ट्र मंत्रालयाच्या म्हणण्या प्रमाण, 2023त कॅनडांत 2,33,532 भारतीय विद्यार्थ्यांची नोंदणी जाल्ली. पूण 2024त हो आंकडो 1,37,608 मेरेन देंवलो. कॅनडांत व्हिसाचे खर नेम आनी भारत आनी कॅनडा हांचे मदल्या राजनैतिक तणावाक लागून ही परिस्थिती जाल्या अशें म्हणटात. पूण अशें आसून लेगीत कॅनडा भारतीय विद्यार्थ्यां खातीर पसंतीचें थळ आसा.
ब्रिटन
अमेरिका आनी कॅनडा उपरांत भारतीय विद्यार्थ्यां खातीर ब्रिटन हें सगळ्यांत चड पसंत आशिल्लें थळ. ब्रिटनांत 98,890 भारतीय विद्यार्थी शिकतात. हो आंकडो फाटल्या वर्सां परस उणो आसा. ब्रिटनांतल्या भारतीय विद्यार्थ्यांचो आंकडो फाटल्या वर्साच्या तुळेंत 2024 वर्सा सुमार 28 टक्क्यांनी उणो जाला. हो आंकडो 2023 वर्सा 1,36,921 आशिल्लो तो 2024 वर्सा 98,890 जालो. व्हिसाचे खर नेम, वाडपी शिक्षण आनी जिणेचो खर्च हाका लागून आतां ब्रिटनांत उणे विद्यार्थी वतात. अशें आसून लेगीत जायते विद्यार्थी अजूनय ब्रिटनाची प्रतिश्ठीत विद्यापिठां आनी ब्रिटनांतल्या एका वर्साच्या मास्टर प्रोग्रामांक लागून विद्यार्थी ब्रिटनाची निवड करतात.
विदेशांत शिकपाची संद कित्याक सोदतात?
भारतीय विद्यार्थी उच्च शिक्षण आनी काम करपा खातीर विदेशांत वचपाची संद सोदतात हाचीं कारणां म्हळ्यार –
भारतांतल्या शिक्षणीक संस्थांनी मर्यादीत प्रवेश – आयआयटी, आयआयएम, एम्स ह्या मुखेल भारतीय संस्थांनी उच्च दर्जाचें शिक्षण दितात, पूण तातूंत मर्यादीत सुवाती आसात. हाका लागून जायत्या पात्र विद्यार्थ्यांक विदेशांत वच्चें पडटा.
बरें करिअर आनी स्थलांतर संद – आंतरराष्ट्रीय पदवी आशिल्ल्या विद्यार्थ्यांक संवसारीक रोजगार बाजारपेठेत प्रवेश करपाची संद मेळटा. अमेरिका आनी कॅनडा सारक्या देशांनी अभ्यासा सयत काम करपाची आनी कायम राबितो पर्याय दितात, जाका लागून जायते जाण हो पर्याय निवडतात.
युरोपांत परवडपी शिक्षण – जायत्या सुवातींनी शिक्षणाचो खर्च वाडिल्ल्यान जायते भारतीय विद्यार्थी जर्मनी कडेन वळपाक लागल्यात. जर्मनींत चडशीं भौशीक विद्यापीठां उणे शुल्क घेतात आनी कांय विद्यापिठां अशीं आसात जीं शुल्क घेनात. शिश्यवृत्ती आनी परवडपी जिणेचो खर्च हाका लागून विद्यार्थ्यांक फ्रांस आनी इटली सारकें देशूय आवडूंक लागल्यात.
अर्थीक मजत आनी शिश्यवृत्ती – जायत्या परकी विद्यापिठांनी भारतीय विद्यार्थ्यां खातीर शिश्यवृत्ती वाडयतात. हातूंत खास करून ब्रिटन आनी ऑस्ट्रेलियांतल्या विद्यापिठांचो आस्पाव जाता. ह्या अर्थीक प्रोत्साहनांक लागून कुटुंबांचेर भार उणो जाता आनी दर्जेदार शिक्षण मेळटा, जें विदेशांत शिकपाचें एक मुखेल कारण आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
