भांगरभूंय | प्रतिनिधी
चौरा, खबरां संस्था ः पंजाब पुलिसांनी सोमारा 18 म्हयन्यांत 11 जाणांची हत्या करपी राम सरुप उर्फ सोधी (३१, चौरा-होशीपूर) हाका अटक केल्या. चवकशे वेळार राम सरुपान आपूण ‘सिरियल किलर’ आशिल्ल्याचें कबूल केलां. इतलेंच न्हय तर ताणें 11 दादल्यांची हत्या केल्ल्याचे कबूल केलां.
लिफ्ट दिवन वा लैंगीक कृत्यांनी गुंतोवन तो तांची हत्या करतालो. सरुपान कांय जाणांक कपड्याचो कुडको घेवन गळो दाबून मारले जाल्यार कांय प्रकरणांनी खून करपा खातीर तांणे विटांचो वापर केलो अशी म्हायती पुलिसांनी दिल्या.
ह्या हत्यां फाटले कारणा म्हळ्यार सादारणपणान वाद वा पयशे दिवपाक न्हयकार दिवप अशें आसा. प्रसार माध्यमांच्या खबरां प्रमाण सरूप दादल्यांक लिफ्ट दितालो आनी जर तांणी न्हयकार दिलो जाल्यार तांकां लुटून तांची हत्या करतालो. एका प्रकरणांत सिरियल किलर सरूपान बळीच्या फाटीर धोकेबाज अशें बरयल्लें. सरुप हो आदलो सैनिक आसून तो पंजाबांत सुरक्षा रक्षक म्हणून काम करतालो. आरोपींचे लग्न जाल्ले आसून ताका तीन भुरगीं आसात. समलिंगीपणाक लागून आरोपीक दोन वर्सां आदीं ताच्या कुटुंबान सोडून दिल्लो.
सरूपाक सुरवेक कीर्तापूर साहिबांत एका खून प्रकरणांत अटक केल्ली. उपरांत चवकशे वेळार तांणी आनीक १० हत्या केल्ल्याचें कबूल केलें. हांतूत पंजाबाच्या रुपनगर, फतेहगढ साहिब आनी होशियारपूर हांगा फाटल्या 18 म्हयन्यांत ह्यो हत्या जाल्ल्यो. कर्तारपूर साहिबचो मनिंदर सिंग हो 37 वर्सां पिरायेचो दादलो सरुपाच्या हत्याचो बळी पडलो. जो मोदरा टोल प्लाझा हांगा च्या दितालो. 18 ऑगस्टाक ताची हत्या जाली.
मजगतीं, आतां मेरेन पांच हत्यांची खात्री जाल्या. जाल्यार हेर खूनांचो तपास पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
