भांगरभूंय | प्रतिनिधी
भांगरभूंय । प्रतिनिधी
पणजीः विज्ञान, तंत्रगिन्यान आनी कोयर वेवस्थापन खातें 7वो मनोहर पर्रीकार विज्ञान महोत्सव 18 डिसेंबराक मनयतले. ह्या महोत्सवाच्या मुखेल कार्यावळीचे एनआयओ दोनापावला जातली. जाल्यार गोंयांतल्या हेर णव सुवातींनी तज्ञां कडल्यान व्याखानां जातली. ह्या वेळार आयआयएसी बंगळूरुचे डॉ. साई गौतम गोपाळकृष्णन हांचो मनोहर पर्रीकार युवा वैज्ञानिक पुरस्कारान भोवमान करतले अशी म्हायती महोत्सव समितीचे अध्यक्ष जुझे नरोन्हा हांणी दिली.
पर्वरी सचिवालयांत जाल्ले पत्रकार परिशदेत जुझे नरोन्हा उलयताले. ह्या वेळार विज्ञान, तंत्रगिन्यान आनी कोयर वेवस्थापन खात्याचें संचालक हरीश अडकोणकार हजर आशिल्ले.
विद्यार्थ्यां मदीं उत्सुकताय आनी वैज्ञानीक प्रवृत्ती घडोवन हाडपा खातीर मनोहर पर्रीकार विज्ञान महोत्सव हो वैज्ञानीक महोत्सवाची रचना केल्या, अशें अडकोणकार हांणी सांगलें.
ह्या महोत्सवांत देशभरांतल्यान नामनेचे वैज्ञानिक, संशोधक आनी युवा प्रतिभा एकठांय येवन परस्पर संवादीत व्याख्यान आनी आकर्शक वैज्ञानीक प्रवचना वरवीं फुडले पिगळेक प्रोत्साहन दितलें. गोंयचे आदले मुख्यमंत्री आनी संरक्षण मंत्री तशेंच आयआयटी बोम्बे पदवुत्तर मनोहर पर्रीकार हांचे दायजाचो भोवमान हो महोत्सवात करता, अशें अडकोणकार हांणी सांगलें.
ह्या कार्यावळीचे उक्तावण मुख्यमंत्री डॉ. प्रमोद सावंत हांचे हस्तुकीं एनआयओ दोनापावल जातले आनी ताचे लायव्ह स्ट्रीमिंग हेर णव सुवातींनी जातले. ह्या णव सुवातींनी 4,300 विद्यार्थ्यांची ताक आसा. ह्यो कार्यावळीं सकाळीं 9 ते दनपरा 1 वरां मजगतीं जातल्यो. सकाळीं 9.30 ते 11.00 वरां मजगतीं बीज भाशणाचे वाख्यान्याचे लायव्ह स्ट्रीमिंग जाले उपरांत सगळ्या सुवातींनी वेगवगेळ्या वाख्यांनाक सुरूवात जातली, अशी म्हायती नरोन्हा हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
