भांगरभूंय | प्रतिनिधी
पणजीः 174 पर्यटकांक घेवन कझाकिस्तानाचें चार्टर विमान मनोहर अंतरराष्ट्रीय विमानतळ मोपा हांगासर देंवलें. कझाकिस्तानांतल्यान येवपी अंदूंच्या पर्यटन हंगामाचें हें पयलें चार्टर विमान आसा.
अांतरराष्ट्रीय पर्यटनाक अदीक उर्बा दीत फ्लाय एरिस्तानाचें हें चार्टर विमान आलमाती कझाकिस्तान हांगा सावन मोपा विमानतळार सकाळीं 10.25 वरांचेर देंवलें. मोपा विमानतळा भायर पर्यटन खात्यान ह्या पर्यटकांक गुलाब दिवन आनी ब्रास बेंड वाजोवन तांकां हुनहुनीत येवकार दिवन गोंयची सरबराय आनी सांस्कृतीक उर्बेची वळख करून दिली.
हे विशीं उलयतना पर्यटन मंत्री रोहन खंवटे हांणी सांगलें की गोंयच्या पर्यटनाचे उदरगती खातीर अंतरराष्ट्रीय हवाई जोडणी घटमूट करपाचेर आमी चड लक्ष दिलां.
नवीं ठिकाणां आस्पावन आनी हंगामी चार्टर वेव्हाराक तेंको दिवन गोंयान आपली संवसारीक संपर्काचो नियोजीत आनी शाश्वत पद्दतीन विस्तार करपाक सुरवात केली. ह्या हंगामांत आलमाटी सावन सुरू जाल्ली चार्टर सेवा गोंयांत वाडपी संवसारीक विस्वासबध्दताय दाखयता, अशें खंवटे हांणी सांगलें.
सद्या चालू पर्यटन हंगामांत आलमाती सावन आयिल्ली हंगामी चार्टर सेवा अांतरराष्ट्रीय पर्यटनाच्या आगमनाक अतिरिक्त गती दिवपाची अपेक्षा आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
