भांगरभूंय | प्रतिनिधी
पणजी : गोंय पुलीस राखीव दळाचे कचेरेंत गोंय कोयर वेवस्थापन म्हामंडळान घडोवन हाडिल्ल्या गाडयो स्क्रॅप मेळाव्याक लोकांचो व्हड प्रमाणांत प्रतिसाद मेळ्ळो. ह्या मेळाव्यांत 170 कण्णम गाडयांची पावणी जावन 1.07 कोटी रुपया महसूल एकठांय जाला, अशी म्हायती गोंय कोयर वेवस्थापनाचे वरिश्ठ अधिकाऱ्यान दिली.
गोंय सरकारान तिसरो गाडयो स्क्रॅप मेळावो वित्त खातें आनी गोंय कोयर वेवस्थापन म्हामंडळा वरवीं आल्तीन गोंय राखीव पुलीस दळाचे कचेरेंत घेतिल्लो. गोंयांतल्यो सरकारी गाडयो ज्यो कण्णम जाल्यात तांचो विलो लावपाची जापसालदारकी कोयर वेवस्थापन म्हामंडळाक दिल्या. ह्या गाडयांचो विलो लावपा खातीर म्हामंडळ कण्णम जाल्ल्या गाडयांची पावणी करता. हातूंत गाडयांचो विलो लावपा सयत सरकाराक येणावळ लेगीत मेळटा.
सुमार 32 सरकारी खातीं, म्हामंडळा आनी स्वायत्त संस्थांच्यो 170 कण्णम गाडयां मदल्यो 128 गाडयो 15 वर्सां पयलीच्यो आनी 42 गाडयो 15 वर्सां सकयल्यो आसात. ह्यो 42 गाडयांचे पावणेंत सामान्य लोकांनी वांटो घेवन चडांत चड बोली लावन विकत्यो घेतल्यो. पूण ज्यो गाडयो 15 वर्सां परस पोरण्यो आसात तांचो केंद्र सरकाराच्या स्क्रॅपींग धोरणा प्रमाण तांचो वापर करपाक मेळना, तांचो विलो लावचो पडटा. हे खातीर फक्त नोंदणीकृत गाडी स्कॅपींग सुविधा (आरव्हीएसएफ) आशिल्ल्या कंत्राटदारांनी बोली लायली. देशभरांतल्यान स कंत्राटदार कण्णम जाल्ल्या गाडयां खातीर बोली लावपाक हजर आसले. ह्या मेळाव्यांत 135 बोलिदारांनी बोली लावन 170 गाडयो विकत्यो घेवन पावणेच्या निमाणें कडेन सरकाराचे तिजोरेंत 1.07 कोटी रुपया महसूल एकठांय जालो.
लक्ष्मीकांत पार्सेकार हांची गाडी 3.20 रुपयांक साsss
आदले मुख्यमंत्री लक्ष्मीकांत पार्सेकर हांची सरकारी गाडी एक्सयूव्ही 500 पावणेंत 3.20 लाखांक साsss जाली. गोंय कोयर वेवस्थापन म्हामंडळान आयोजीत केल्ल्या स्क्रेप मेळाव्याक पार्सेकार हांच्या सरकारी गाडयेचो आस्पाव आशिल्लो. हाची उण्यांत उणी बोली 1.20 लाख रुपया आशिल्ली. निलेश देसाय हांणी सगळ्यांत चड 3.20 लाख रुपयांची बोली लावन ती घरा व्हेली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
