भांगरभूंय | प्रतिनिधी
कोची ः गुन्यांवाची चवकशी केन्ना सुरू जातली, केन्ना सोंपतली आनी गुन्यांवकाराक केन्ना ख्यास्त जातली हें सांगप कठीण. केरळांतय असोच एक गुन्यांव उजवाडाक आयला. सुमार 17 वर्सां उपरांत. हे एके बायलेचें खून प्रकरण. विशेश गजाल म्हळ्यार ह्या प्रकरणाची सीबीआय चवकशी करपाची मागणी करून थेट उच्च न्यायालयांत वचपी तिच्या घोवानूच तिका मारिल्ली अशें पुलीस चवकशेंतल्यान उक्ते जालां.
प्रकरण कितें?
2006 वर्साची गजाल. केरळांतल्या पुल्लड गांवांतल्या 50 वर्सां पिरायेच्या रमादेवीचो तिच्या घरांत खून जालो. घोव जनार्दनान दाखल केल्ले कागाळी प्रमाण, ताणें बायलेची कूड सगळ्यांत पयलीं पळयली. घर भितरल्यान बंद आशिल्लें. देखून घरांत भितर सरपाक दाराच्या वयर आशिल्ल्या जनेलाचो उपेग आपणें केलो अशेंय जनार्दनान सांगलें. गुन्यांवकारान रमादेवीक मारून भितरल्यान दार बंद करून भायर सरलो आसूं येता, असो अदमास ताणें कागाळींत केल्लो.
लागसारच्या लोकांच्या म्हणण्या प्रमाण, खुनाच्या सप्तका आदीं तमिळनाडूचे एक मजूर जोडपें ह्या वाठारांत रावपाक आयिल्लें. तातूतल्या दादल्याक खूनाच्या दिसा भोंवतणच्या लोकांनी जनार्दननाच्या घरा लागसार पळयल्लो. पूण भोंवतणच्या लोकांनी दावो केलो की जेन्ना तांकां खून जाला आनी आपल्याचेर दुबाव येता अशें दिसलें तेन्ना हो मनीस थंयच्यान आपले बायले वांगडा नाच्च जालो. देखून पुलिसांनी ताचें नांव ह्या खुनांत मुखेल आरोपी म्हणून निश्चीत केलें.
2007 वर्सा जनार्दननान केरळ उच्च न्यायालयांत आपल्याचेर दुबाव येवचो न्हय म्हणून याचिका दाखल करून सीबीआय चवकशी करची अशी मागणी केली. पूण ही मागणी मान्य जाली ना.
फाटल्या वर्सा जुलय सावन पुलिसांनी परतून एक फावट ह्या प्रकरणाची चवकशी सुरू केली. जनार्दनाचो दुबाव मारता तें पळोवन पुलिसांनी घडणुकेच्या सुवातेर एकठांय केल्ल्या पुराव्यांची परतून तपासणी केली. रमादेवीच्या हातांत कांय केंस मेळिल्ले. मुखेल आरोपी गायब आशिल्ल्यान पुलिसांनी ते हेर कोणा कडेन जुळोवन पळयलें ना. पूण आतां पुलिसांनी तें जनार्दनाच्या डीएनए कडेन जुळोवन पळयना फुडें पुलिसांक धक्कोच बसलो!
रमादेवीच्या हातांत मेळिल्ल्या केसांचे डीएनए आनी घोव जनार्दननाचे डीएनए सारके आशिल्ल्याचें पुलिसांक कळ्ळें. हाचे उपरांत पुलिसांनी चवकशी केली तेन्ना ही गजाल उजवाडाक आयली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
