भांगरभूंय | प्रतिनिधी
खबरां संस्था
नवी दिल्लीः भारतयी क्रिकेट नियामक मंडळान (बीसीसीआय) बिरेस्तार 2022-23च्या सिझना खातीर भारतीय बायल क्रिकेट पंगडांतल्या 17 खेळगडींक वर्सुकी सेंट्रल कॉन्टेक्ट्र दिवपाची घोशणा केली. हरमनप्रीत सिंग, स्मृती संधाना आनी दीप्ति शर्माक हांचो ए ग्रेडींत आसपाव केला. जेमिना रॉड्रिग्ज आनी रिचो घोषाक बी ग्रेटींत बडती दिल्या जाल्यार पूजा वस्त्राकर बी तल्यान सी ग्रेडींत पावले.
ए ग्रेडींत आशिल्ल्या तीन खेळगडींक वर्साक दरेकी 50 लाख रुपया मेळटले. रेणुका सिंग आनी शेफाली वर्मा सयत पांच खेळगडींक बी ग्रेडींत दवोरलां. मेघना सिंग आनी स्नेहा राणा सयत 9 खेळगडी सी ग्रेडींत आसात. बी ग्रेडींतल्या खेळगडींक दरेकी 30 लाख जाल्यार सी ग्रेडींतल्या दरेकी 10 लाख रुपया मेळटले. पोरू ह्या तिनूय ग्रेडींतल्या खेळगडंक हीच रक्कम मेळटाली.
26 दादले खेळगडे कॉन्टेक्ट्रांत
फाटल्या म्हयन्यांत बीसीसीआय 2022-23 सिझना खातीर 26 दादले क्रिकेट खेळगड्यांक सेंट्रल कॉन्ट्रक्टांत घेतिल्ले, ए प्लस ग्रेडींत हे खेपा चार खेळगडे आसा. दर खेपे तीन खेळगड्यांक हे ग्रेडींत सुवात मेळटा. ए ग्रेडींत 5, बी ग्रेडींत 6 आनी सी ग्रेडींत 11 खेळगड्यांचो आसपाव केला.
2015 वर्सा बायक क्रिकेटरांक पयले खेप कॉन्ट्रेक्ट मेळिल्लो. तेन्ना ए ग्रेडीत 15 आनी बी ग्रेडींत 10 लाख रुपये मेळटाले. तेन्ना दातले खेळगड्यांक ए ग्रेडींत 1 कोटी, बी ग्रेडीत 50 आनी सी ग्रेडींत 30 लाख रुपया मेळटाले. 2018 वर्सा बायल खेळगडीं खातीर सी ग्रेडीचो आसपाव केल्लो. आता ए ग्रेडींत बायल खेळगडींक 50 लाख, बी ग्रेडीक 30 आनी सी ग्रेडीत 10 लाख रुपया मेळटात. दादले खेळगड्यांच्या ए प्लस ग्रेडींत 7 कोटी, ए ग्रेडींत 5 कोटी, बी ग्रेडींत 3 कोटी आनी सी ग्रेडींत 1 कोटी रुपया मेळटात. दादल्यांचे तुळेंत बायल खेळगडींक मेळटा ती रक्क्म कांयच न्ही अशी आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
