भांगरभूंय | प्रतिनिधी
पणजीः रान खात्यान 17 ते 19 जानेवारी ह्या काळांत काणकोण म्हालांतल्या खोतिगांव रानवटी जीव अभयारण्यांत 8 व्या गोंय पक्षी महोत्सवाचें आयोजन केलां. तीन दिसांच्या महोत्सवांत सुकणीं मोगी आनी रानवटी जीव जाणकारांक गोंयच्या समृद्ध अश्या सुकण्यांचे जिणेचो अभ्यास करपाची संद मेळटली. तशेंच सुकण्यांचे जातींचो सांबाळ, रानवटी जीव फोटोग्राफी, पक्षी पर्यटन, सुकण्यांची जीण आनी सुकण्यांचें शास्त्र अश्या विशयांचेर महोत्सवांत भर दितले.
महोत्सवाचो उक्तावण सुवाळो 17 जानेवारीक इंटरनॅशनल सेंटर गोंय, दोनापावला जातलो. रान खात्याचे मंत्री विश्वजीत राणे हांचे हस्तुकीं गोंय रान विकास म्हामंडळाचे अध्यक्ष आनी मुख्य सचिवाचे हाजिरेंत महोत्सवाचें उक्तावण जातलें. ह्या वेळार गोंयच्या सुकण्यांचे जाती वयल्या दोन पुस्तकांचें विमोचन जातलें. तशेंच गोंयच्या रानवटी जीव अभयारण्यांच्या मॅस्कॉटाचें अनावरण जातलें.
महोत्सवा निमतान सुकण्यांचे जिणेचेर सुकणें तज्ञांची व्याख्यानां आनी चर्चासत्रां जातलीं. उत्तराखंड रान विभागाचे प्रधान मुख्य रान संरक्षक आनी सुकणें तज्ञ डॉ. धनंजय मोहन, सुकणीं फोटोग्राफर इंद्रजीत घोरपडे, सुकणीं तज्ञ डॉ. प्रणय वैद्य, पर्यावरण तज्ञ डॉ. मधुरा निंफाडकर, सुकणीं तज्ञ निरव भट हांचीं व्याख्यानां आनी चर्चासत्रां जातलीं.
ह्या महोत्सवांत वांटेकार जावपाक नोंदणी करपा खातीर https://birdfestival.goa.gov.in/ हे बॅबसायटीक भेट दिवची. नोंदणी 14 जानेवारीक बंद जातली. नोंदणी शुल्क 3500 रुपया (विद्यार्थ्यां खातीर एक हजार रुपया) आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
