भांगरभूंय | प्रतिनिधी
पणजीः गोंयभरांतले तरणाटे उमळशीकेन वाट पळयतात तो कोंकणी भाशा मंडळाचो 27 वो गोवा युवा महोत्सव अंदूं 17 आनी 18 जानेवारीक फर्मागुडयेर जी. व्ही. एम्स्. कॉलेजीच्या मैदानाचेर जातलो. अंत्रूज घुडयो, बांदोडा आनी गोंय विद्याप्रसारक मंडळ फोंडा हे महोत्सवाचे सह-आयोजक आसात. राजभास संचालनालय, गोंय सरकार ह्या महोत्सवाक अर्थीक आदार दितले.
गोंयभरांतल्या म्हाविद्यालयांतल्यान, उच्च माध्यमीक शाळांतल्यान आनी संस्थांचे तीस परस चड पंगड ह्या महोत्सवांत वांटो घेतले आनी सुमार 1200 ते 1500 तरणाटे आपली कला सादर करतले.
महोत्सवांत वट्ट पंदरा सर्ती आयोजीत केल्यात. कांय सर्ती फकत शिक्षणीक संस्थां खातीर, कांय फकत क्लब वा संस्थां खातीर आनी कांय सर्ती दोनूय पंगडां खातीर उक्त्यो आसात. लोकमांड, गीत गायतना, जुगलबंदी, फास्की, लोक नाट्य, खेळ, आयलें तशें गायलें, ई-वेस्ट शिल्पकला बांदणी, प्रस्नमाची, रंगीत खोमीस, कोंकणी लघुपट, मुस्तायकी, नाच नाच नाचुया, नमन, रील अश्यो विंगड सर्ती ह्या दोन दिसांच्या महोत्सवांत घडून येतल्यो.
ह्या महोत्सवाच्या स्थळाक नामनेचे साहित्यीक माणिकराव गावणेंकार हांचें नांव दिलां. तशेंच ह्या महोत्सवाच्या मुखेल माचयेक तियात्रीस्त मायक मेहता, दुसऱ्या माचयेक तियात्रीस्त लुईझा फर्नांडीस, प्रवेशदाराक कवी अशोक भोंसलो, प्रदर्शन दालनाक नाट्य कलाकार जगदीश वेरेंकार आनी चौकाक नाट्य दिग्दर्शक दिगंबर सिंगबाळ हांचीं नांवां दिल्यांत.
पत्रकार परिशदेक येवकाराध्यक्ष नरेंद्र सावयकार, कोंकणी भाशा मंडळाची अध्यक्ष रत्नमाला दिवकार, अंत्रूज घुडयोची अध्यक्ष सुविधा नायक, युवा महोत्सवाचो कार्याध्यक्ष पुरषोत्तम वेर्लेकार आनी मुखेल संयोजक तानाजी गावडे आनी हेर हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
