भांगरभूंय | प्रतिनिधी
बा. द. सातोस्कार हांचे पुस्तक तशेंच पुर्तुगेज दस्तावेजांतय हाचो उल्लेख केला: प्रो. प्रजल साखरदांडे
पणजीः पेडणें, दिवचल, सत्तरी, सांगे, केपे आनी काणकोण तालुक्यांनी 1664 सावन फुडली कांय वर्सां छत्रपती शिवाजी महाराज हांची सत्ता चल्ली. डॉ. पांडुरंग पिसुर्लेकार तशेंच गोवा गॅझेटीअरांत हाचो स्पश्ट उल्लेख आयला अशें इतिहासकार प्रा. प्रजल सखरदांडे हांणी म्हणलां.
ह्या तालुक्यांनी शिवाजी महाराजाची सत्ता आशिल्ली असो उल्लेख मुख्यमंत्री डॉ. प्रमोद सावंत हांणी शिवजयंती निमतान दिल्ल्या भाशणांत केल्लो. मुख्यमंत्र्याचो दावो फटीचो असो निश्कर्श काडिल्लो अॅड. उदय भेंब्रे हांचो व्हिडियो व्हायरल जाले उपरांत आतां नवो वाद सुरू जाला.
बा. द. सातोस्कार तशेंच पुर्तुगेज दस्तावेजांतय हाचो उल्लेख आसा अशें प्रा. साखरदांडे हांणी सांगलें. प्रा. डाॅ. पांडुरंग पिसुर्लेकार हांणीय पुर्तुगेज- मराठी संबंदांचेर बरयिल्ल्या पुस्तकांत पान 50 ते 86 ह्या पुस्तकांत हाचो उल्लेख केला, अशें हे विशीं म्हायती दितना साखरदांडे हांणी सांगलें.
शिवाजी महाराजान 1664 वर्सा आदिलशाहा कडल्यान पेडणें, दिवचल, सांखळी, सत्तरी हे प्रदेश आपल्या ताब्यांत घेतले. 19 नोव्हेंबर 1667 दिसा शिवाजी महाराज हांणी कोलवाळ किल्लो आपल्या शेकातळा हाडलो. हाचे उपरांत 6 डिसेंबर 1667 दिसा शिवाजी महाराज हांणी नार्वेंतल्या सप्तकोटेश्वर देवळाक भेट दिली. 13 नोव्हेंबर 1668 दिसा तांणी त्या देवळाची जीर्णोद्धार केली. 1675 वर्सा शिवाजी महाराज हांणी फोंडा, सांगे, केपे आनी काणकोण हे तालुके आपल्या ताब्यांत घेतले. 1679 वर्सा शिवाजी महाराजान बाळ्ळीच्या हवालदाराक बेतुल किल्लो बांदपाचो आदेश दिलो. हाचो पुस्तकांत उल्लेख आसा, अशें प्रा. प्रजल सखरदांडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
