भांगरभूंय | प्रतिनिधी
800 परस चड शिक्षक, ग्रंथपाल, विद्यार्थीं घेतले वांटो
भांगरभूंय । खबरां मेज
पणजी : कोंकणी भाशा मंडळान राजभास संचालनालय आनी गोंय, एस.सी.ई.आर.टी. तशेंच मोन्जिनीस हांच्या जोड पालवान, 16 आनी 17 फेब्रुवारीक मडगांवच्या रवीन्द्र भवनांत दोन दिसांचे कोंकणी बाल साहित्य परिशदेचें आयोजन केलां, अशी म्हायती कोंकणी भाशा मंडळाची अध्यक्ष रत्नमाला दिवकार हांणी पत्रकार परिशदेंत दिली.
बुधवारा 11 फेब्रुवारीक मडगांवच्या कोंकणी भवनांत आयोजीत केल्ले पत्रकार परिशदेंत अध्यक्ष दिवकार उलयताली. ह्या वेळार कोंकणी भाशा मंडळाचे सरचिटणीस मंगलदास भट, संयोजक चेतन आचार्य आनी लियोनार्ड फर्नांडीस हाजीर आशिल्ले.
कोंकणी बाल साहित्यांत दर्जेदार साहित्य येवचें तशेंच भारतांतल्या सृजनशील लेखकांचें मार्गदर्शन आमच्या लेखक, शिक्षक, विद्यार्थी, ग्रंथपाल हांकां मेळचें अशी मंडळाची मोख आसा. 16 फेब्रुवारीक सकाळीं 10 वरांचेर नामनेचो हिंदी लेखक प्रियवंद परिशदेचें उक्तावण करतले.
उक्तावणा उपरांत दनपारां 12 ते दनपारां 1.30 मेरेन परिशदेचें पयलें सत्र ‘बाल साहित्यांतले समकालीन विशय’ ह्या विशयाचेर आसतलें, सुशील शुक्ल आनी सोनिका कौशिक हाजीर आशिल्ल्यांक मार्गदर्शन करतले. जेवणा उपरांत दनपारां 3 ते सांजेच्या 5 वरां मेरेन सुशील शुक्ल, सोनिका कौशिक, दिनेश मणेरकार, जुझे लोरेन्झो, नयना आडारकार आनी हर्षा शेट्ये हांचें साहित्य सादरीकरण आसतलें. तशेंच ‘पेटूल’ कार्यावळींत मडगांव आनी शिरोडें विद्यालयांतलीं भुरगीं कोंकणी शाणी मस्ती सीडीच्या पदांचेर नाच सादर करतलीं. मजगतीं ‘आल्लय’ (मौखीक साहित्य) नांवाची सीडी आनी पुस्तक लोकार्पण जातलें. हांचें संकलन लेखक कमलाकर म्हाळशी आनी कवी उषा कामत हांणी केलां, अशें दिवकार हांणी सांगलें.
ह्या वेळार परिशदेचे संयोजक चेतन आचार्य हांणी सांगलें, 17 फेब्रुवारीक सकाळीं 9.30 ते 1.30 मेरेन ‘शिक्षणांत बाल साहित्याची भुमिका’ ह्या विशयाचेर डॉ. सुनीता मिश्रा, डॉ. नारायण देसाय आनी आरती मुथन्ना आपले विचार मांडटले. ‘बाल साहित्यांत चित्रकला प्रक्रिया आनी म्हत्व’ ह्या विशया वयल्या दनपारां 11.30 ते दनपारां 1 वरां मेरेन जावपी निमाण्या सत्रांत चित्रकार चंद्रमोहन कुलकर्णी आनी इंद्रप्रोमित रॉय हे मार्गदर्शन करतले. मंडळाचे वतीन 7वी बाल साहित्य परिशद आयोजीत करून जैतिवंत करूंक मंडळाचे अधिकारी, वांगडी वावुरतात. अंदूं हे परिशदेंत 800 परस चड शिक्षक, ग्रंथपाल, विद्यार्थीं, साहित्य वांगडी हाजीर आसतले. लेखक, शिक्षक आनी बाल साहित्यांत रूची आशिल्ल्यांक एकठांय हाडून बाल साहित्या विशीं आनी शिक्षणांत ताचें म्हत्व जाणून घेवप, हो ह्या कार्यावळीचो हेत आसा. तेचवरी साहित्य सादरीकरणांत गोंय आनी हेर राज्यांतले साहित्यकार वांटेकार जातले अशें संयोजक आचार्य हांणी सांगलें.
अध्यक्ष रत्नमाला दिवाकर हांणी दिलो. सरचिटणीस मंगलदास भट हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
