भांगरभूंय | प्रतिनिधी
पणजीः राज्य सरकार वेगवेगळ्या खात्यां खाला 16 व्या वित्त आयोगा कडेन 28 हजार कोटींची मागणी करतले. गोंयची लोकसंख्या जरी ल्हान आसली तरी पर्यटक आनी स्थलांतरीत कामगारांची लोकसंख्या धरुन (फ्लोटींग पॉपुलेशन) 1 कोटी मेरेन पावता. हाचे खातीर राज्याक चड निधी दिवचो अशी मागणी करतलें, अशें मुख्यमंत्री डॉ. प्रमोद सावंत हांणी सांगलें.
16 वो वित्त आयोग 9 आनी 10 जानेवारीक गोंयांक भेट दितलो. राज्य सरकारा वांगडा आयोगाचे वांगडी राजकी पक्ष, पंचायत, उद्देग आनी हेर संघटणां कडेन चर्चा करतले. निधी आनी प्रकल्प सादर करपाची तयारी सरकारान सुरू केल्या अशें मुख्यमंत्री डॉ. सावंत हांणी बसके उपरांत सांगलें.
पर्यटन खात्या खातीर 1,693 कोटी, वीज खात्या खातीर 4,160 कोटी, शिक्षणा खातीर 1,536 कोटी, भलायकी खात्या खातीर 631 कोटी, हरीत उर्जा खातीर 7,350 कोटी, भौशीक बांदकाम खात्या खातीर 5,460 कोटी, उदका स्त्रोत खात्या खातीर 3,401 कोटी, आपत्ती वेवस्थापन खातीर 1,982 कोटी, कोयर वेवस्थापना खातीर 733 कोटी, हवामान बदल खात्या खातीर 379 कोटींची मागणी करपाचो प्रस्ताव तयार केला.
ल्हान वाठार आनी लोकसंख्या उणी आशिल्ल्यान गोंयाक इतली वर्सां 0.35 टक्के निधी मेळ्ळो. आतां तो वट्ट अर्थसंकल्पांतल्यान 1 टक्के दिवपाची मागणी जातली. पर्यटक आनी स्थलांतरीत कामगारांक लागून गोंयांत लोकसंख्ये परस चड लोक आसात. ह्यो सगल्यो गजालीं पटोवन दिवपी सादरीकरण आयोगा मुखार करतलें अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
