16 वर्सा पिरायेच्या चलयेची बापायनच केली हत्त्या
भांगरभूंय | प्रतिनिधी
भांगरभूंय । खबरां संस्था
पंजाब ः निहंग शीख समाजांतल्या एका इसमान आपल्या सोळा वर्सां पिरायेच्या चलयेची हत्त्या केल्ल्याची घडणूक उजवाडाक आयल्या. इतलेंच न्हय, ह्या बापायन चलयेची कूड आपल्या मोटारसायकलीक बांदून गांवांत ओडीत व्हेली. ही घडणूक पंजाबांतल्या अमृतसर जिल्ह्यांतल्या मुछाल गांवांत घडली. 16 वर्सां पिरायेचे नेण्टे चली कोणाक कळयनासतना एक दीस घरांतल्यान भायर रावल्या उपरांत बापायन हें धक्को दिवपी पावल उखल्लें अशें चवकशेंतल्यान स्पश्ट जाता.
पुलिसांनी दिल्ले म्हायती प्रमाण आरोपी आपल्या घरांतल्यान 500 मीटर अंतराचेर आशिल्ल्या रेल्वे क्रॉसिंगाचेर आपल्या चलयेची कूड सोडून थंयच्यान पळून गेलो आनी अजूनय तो फरार आसा. पुलिसांनी गुन्यांव नोंद केल्या. आरोपीन आपल्या कुटुंबांतल्या वांगड्यांक घरांत भितर दवरून तांकांय मारपाची धमकी दिली. देखून कोणूच भंयान घरांतल्यान भायर सरूंक शकले नात.
बुधवारा आपली नात घरांतल्यान भायर सरल्या अशें आरोपीच्या बापायन सांगलें. आमी तिचो सोद घेतलो पूण ते मेळूंक ना. ब्रेस्तारा दनपारां तें परत येतकच तिच्या बापायन तिची चवकशी केली. तिणें कांयच सांगलें ना. पुलिसांच्या एफआयआर प्रमाण आरोपीन आपले चलयेचेर धारदार शस्त्रां वापरचे पयलीं शारिरीक अत्याचार करून तिका मारली.
मजगतीं, गांवांतल्या बलबीर सिंगान दावो केला, आरोपी जायत्या ल्हान कारणांक लागून भुरग्यांक आनी बायलेक मारतालो. ती चली बेपत्ता जाली तेन्नाच ताका तिडक आयल्ली अशें ताचे बायलेन सांगलें. ह्या मनशाक चार चलयो आनी पांच पूत आसात. मेल्ली तरणाटी तांचें तिसरें भुरगें आशिल्लें. चलयेची कूड पुलिसांनी ताब्यांत घेतल्या. पुलिसांनी फुडली कारवाय करपाक सुरवात केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
