भांगरभूंय | प्रतिनिधी
पणजीः गोंयांत अपघात उणें करपा खातीर 16 वर्सांच्या भुरग्यांक गाडी चलोवपाचे लाससन्स दियात. आताचे भुरगे स्मार्ट जाल्यात, तांकां गाडी चलोवपाक दिवपाक हरकत ना, अशी मागणी उत्तर गोंय काँग्रेस सरचिटणीस विजय भिके हांणी केल्या.
भिके हांणी पणजे काँग्रेस हावसांत पत्रकार परिशद घेतली. ह्या वेळार उत्तर गोंय काँग्रेसचे अध्यक्ष विरेन्द्र शिरोडकार, सांताक्रुझ मतदारसंघाचे काँग्रेस गट अध्यक्ष जॉन नाझारेथ, युवा काँग्रेस उपाध्यक्ष जीना परेरा आनी हेर मानेस्त हजर आसले.
पालकांचो चडसो वेळ भुरग्यांक स्कुलांनी हाडपाक आनी पावोवपाक वता आनी ह्या कोफुसावांक लागून अपघात जातात. पयलीं 16 वर्साच्या भुरग्यांक लर्नींग लायसन्स दिताले, तेन्ना कांयच विशय जावंक ना, असो युक्तिवाद भिके हांणी केलाे.
युरोप आनी अमेरिकेंत 16 वर्सां जाले उपरांत लायसन्स मेळटा. पूण थंयसर रस्ते बरे आसात आनी देखून गोंयांतूय 16 वर्सां पिरायेच्या भुरग्यांक लायसन्स दिवचे पयलीं गोंयचे रस्ते बरे करचे, अशी मागणी भिके हांणी केल्या.
जाल्यार जॉन नाझारेथ हांणी बाबत रस्त्या वेल्यान सरकाराक शिटकायला. पुलीस हेल्मेट घालना तांकां तालांव मारपाक बिझी आसतात, पूण लायटीचे केबल घालपा खातीर मारिल्लीं फोंडकुलां पुरोवपाक सरकारा कडेन वेळ ना, असो आरोप नाझारेथ हांणी केला.
रस्त्या वेल्या फोंडकुलांनी गाडयो चलयात तांचो परिणाम दीर्घकाळा उपरांत दिसून येतलो. फोंडकुलांतल्यान दुचाकी गेल्यार पुराय आंग हालता तेन्ना आमचे मंजातंतू आनी मानेक मार बसता. हे आतां कळचे ना, फुडें ह्या अवयवांक मार बसून आरींचें दुयेंस जावपाची शक्यताय आसा, असो हुस्को नाझारेथ हांणी उक्तायला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
