भांगरभूंय | प्रतिनिधी
पणजी : गोंय आनी अस्मिताय तिगोवन दवरपाच्या इतिहासीक निर्णयाक मान दिवपा खातीर राज्य सरकारान दर वर्सा १६ जानेवारी हो अस्मिताय दीस म्हूण मनोवपाचो निर्णय घेतला.
हे विशीं शाळांनी गोंयची अस्मिताय, दायज आनी संस्कृताय हांचेर भर दिवपी कार्यावळी १६ जानेवारीक आयोजीत करच्यो. हातूंत जनमत चाचणी, राज्याचें गिरेस्त सांस्कृतीक दायज, इतिहास, परंपरा, लोककला, संगीत, नाच आनी हेर सांस्कृतीक कार्यावळी घडोवन हाडूं येतात.
शाळांनी विद्यार्थ्यां खातीर आनी शिक्षकां खातीर जनमत दिसाचें म्हत्व, गोंयची अस्मिताय आदी विशयांचेर सकयल दिल्ल्या खंयच्याय कार्यावळींचें आयोजन करूं येता.
१) निबंद / वक्तृत्व/ पोस्टर मेकींग/ देशभक्ती गीतगायन सर्त / परंपरीक भेसवण सर्त, प्रस्नमंजुषा,
२) गोंयची अस्मिताय, सांस्कृतीक दायज, गोंयची परंपरा आनी अभिव्यक्ती दाखोवपी उलोवप /जागृताय कार्यावळ.
३) जनमत चाचणेचेर माहितीपटाचें प्रदर्शन.
वयल्यो कार्यावळी कोंकणी/ मराठी/ हिंदी/ इंग्लीश भाशेंत करूं येतात. कार्यावळी खातीरचो खर्च शाळेन करचो. सहभाग घेतिल्ल्यांचो आंकडो आनी जिओ टॅग केल्ले कार्यावळीचे फोटो आनी व्हिडियो https://forms.gle/GMs5LdXWgEatLoqd9 ह्या लिंका वरवीं २१/०१/२०२६ दिसा वा ताचे आदीं अपलोड करूंक शकतात.
सगळ्या सरकारी/ सरकारी अनुदानित/ बिगर अनुदानीत, माध्यमीक आनी उच्च माध्यमीक शाळांतल्या विद्यार्थी आनी शिक्षकांचो पुराय सहभाग हे कार्यावळींत आसतलो हाची जापसालदारीक शाळांच्या मुखेल्यांनी घेवची, अशे निर्देश शिक्षण संचालक शैलेश आर. सिनाय झिंगडे हांणी पत्रका वरवीं दिल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
