भांगरभूंय | प्रतिनिधी
मडगांव: कोंकणी भाशा मंडळान राजभास संचालनालय आनी गोंय, एस.सी.ई.आर.टी. आनी मोन्जिनीस हांच्या जोड पालवान १६- १७ फेब्रुवारीक मडगांवच्या रवीन्द्र भवनांत दोन दिसांची कोंकणी बाल साहित्य परिशदेचें आयोजन केलां, अशी म्हायती कोंकणी भाशा मंडळाची अध्यक्ष रत्नमाला दिवकार हांणी मडगांवच्या कोंकणी भवनांत आयोजीत केल्ले पत्रकार परिशदेंत दिली. ह्या वेळार मंडळाचे सरचिटणीस मंगलदास भट, संयोजक चेतन आचार्य आनी लियोनार्ड फर्नांडीस हाजीर आशिल्ले.
कोंकणी बाल साहित्यांत दर्जेदार साहित्य येवचें तशेंच भारतांतल्या सृजनशील लेखकांचें मार्गदर्शन लेखक, शिक्षक, विद्यार्थी, ग्रंथपाल हांकां मेळचें अशी मंडळाची मोख आसा. १६ फेब्रुवारीक सकाळीं १० वरांचेर हिंदी लेखक प्रियवंद परिशदेचें उक्तावण करतले.
उपरांत पयलें सत्र ‘बाल साहित्यांतले समकालीन विशय’ ह्या विशयाचेर दनपरां १२ ते दनपारां १:३० मेरेन सुशील शुक्ल आनी सोनिका कौशिक मार्गदर्शन करतली. जेवणा उपरांत दनपरां ३ ते ५ मेरेन सुशील शुक्ल, सोनिका कौशिक, दिनेश मनेणकार, जुझे लोरेन्झो, नयना आडारकार आनी हर्षा शेट्ये हांचें साहित्य सादरीकरण आसतलें.
पेटूल कार्यावळींत मडगांव आनी शिरोडें विद्यालयांतलीं भुरगीं ‘शाणी मस्ती’ सिडीच्या पदांचेर नाच सादर करतलीं.. मजगतीं ‘आल्लय’ (मौखीक साहित्य) नांवाची सिडी आनी पुस्तकाचें लोकार्पण जातलें. तिचें संकलन लेखक
कमलाकर म्हाळशी आनी कवी उषा कामत हांणी केलां, अशें दिवकार हांणी सांगलें.
चेतन आचार्य हांणी सांगलें, १७ फेब्रुवारीक सकाळीं ९:३० ते ११:३० मेरेन ‘शिक्षणांत बाल साहित्याची भुमिका’ ह्या विशयाचेर डॉ. सुनीता मिश्रा, डॉ. नारायण देसाय आनी आरती मुथन्ना विचार मांडटली. ‘बाल साहित्यांत चित्रकला प्रक्रिया आनी म्हत्व’ ह्या विशयाचेर निमाणें सत्र चित्रकार चंद्रमोहन कुलकर्णी आनी इंद्रप्रोमित रॉय दनपरां ११:३० ते दनपरां १ मेरेन मार्गदर्शन करतले.
७ वी बाल साहित्य परिशद जैतिवंत करूंक मंडळाचे अधिकारी, वांगडी वावुरतात. अंदूं वर्सा हे परिशदेंत ८०० परस चड शिक्षक, ग्रंथपाल, विद्यार्थी, साहित्यीक वांगडी हाजीर आसतले. लेखक, शिक्षक आनी बाल साहित्यांत रूची आशिल्ल्यांक एकठांय हाडून बाल साहित्या विशीं आनी शिक्षणांत ताचें म्हत्व जाणून घेवप, हो ह्या कार्यावळीचो हेत आसा. तेच परी साहित्य सादरीकरणांत गोंय आनी हेर राज्यांतले साहित्यकार वांटेकार जातले अशें संयोजक आचार्य हांणी सांगलें.
येवकार अध्यक्ष रत्नमाला दिवकार हांणी दिलो. सरचिटणीस मंगलदास भट हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
