भांगरभूंय | प्रतिनिधी
नवी दिल्ली, खबरां संस्था ः सरकारान 156 फिक्स्ड डोस कॉम्बिनेशन (FDC) वखदांचेर बंदी घाल्या. जोर आनी थंडी सोडल्यार वेदनाशामक, मल्टी व्हिटॅमिन आनी प्रतिजैव वखद म्हणून ताचो वापर चड जातालो. तांचो वापर केल्ल्यार मनशाक धोको निर्माण जावपाची शक्यताय आसा अशें सरकारान सांगलां. ताका लागून देशभरांत ह्या वखदांचे उत्पादन, सेवन आनी वितरणाचेर बंदी घालतले.
वखदां तंत्रीक सल्लागार मंडळाच्या शिफारशींच्या आदाराचेर सरकारान हो आदेश जारी केला. एकाच गुळयेंत एकापरस चड वखदां मिक्स करून तयार केल्ल्या वखदांक फिक्स्ड डोस कॉम्बिनेशन ड्रग्स (FDC) अशें म्हण्टात, ह्या वखदांक ‘कॉकटेल वखदां’ अशेंय म्हण्टात.
केंसांचेर उपचार, स्किनकेअर आनी अँटी-एलर्जिक वखदांचोय आस्पाव…
केंद्र सरकारान जारी केल्ल्या आदेशाप्रमाण अमायलेस, प्रोटीज, ग्लुकोअमायलेज, पेक्टिनेज, अल्फा गॅलॅक्टोसिडेस, लैक्टेज, बीटा-ग्लुकोनेज, सेल्युलेज, लिपेस, ब्रोमेलेन, झायलेनेज, हेमिसेल्युलेज, माल्ट डायस्टेस, इनव्हर्टेज आनी पॅपेन हांचो वापर केल्ल्यार मनशांक धोको निर्माण जावपाची शक्यताय आसा.
बंदी घाल्ल्या वखदांचे वळेरेंत केंसांचेर उपचार, अँटीपॅरासायटिक, स्किनकेअर, अँटी-एलर्जिक आदी वखदांचो आस्पाव आसा. ह्या वखदांक दुसरो पर्याय बाजारांत उपलब्ध आसा अशें सरकारान सांगलें. तांचेर कसलेच निर्बंध आसचे नात.
पॅरासिटामॉल 125 मिग्रॅ गुळयांचेरूय बंदी
भलायकी मंत्रालयान जारी केल्ले अधिसुचोवणे प्रमाण ‘असिक्लोफेनॅक 50mg + पॅरासिटामॉल 125mg टॅब्लेट’ (‘Aciclofenac 50mg + Paracetamol 125mg Tablets’) प्रतिबंधीत वखदांचेरुय बंदी घाल्या. पॅरासिटामॉल, ट्रामाडोल, टॉरिन आनी कॅफीन हांचेरुय बंदी आसा. ट्रामाडोल हें ओपिओयड आदारीत वेदनाशामक वखद आसा.
ह्या एफडीसी वखदांचेरूय बंदी..
मेफेनॅमिक ऍसिड + पॅरासिटामॉल इंजेक्शन,
सेटिरीझाइन HCL + पॅरासिटामॉल + फेनिलेफ्रीन HCL,
लेवोसेटीरिझिन + फेनिलेफ्रीन एचसीएल + पॅरासिटामॉल,
पॅरासिटामॉल + क्लोरफेनिरामाइन मॅलेट + फेनिल प्रोपेनोलामाइन आनी
कॅमिलोफिन डायहाइड्रोक्लोराइड 25 मिग्रॅ + पॅरासिटामॉल 300 मिग्रॅ
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
