भांगरभूंय | प्रतिनिधी
पणजीः गोवा कोंकणी अकादेमी, पणजी आनी रोजरी वाणिज्य आनी कला म्हाविद्यालय, नावेली हांच्या जोड पालवान 15 ते 16 फेब्रुवारी असे दोन दीस 24 वें युवा कोंकणी साहित्य संमेलन आयोजीत केलां. ह्या सुवाळ्याक नामनेचे लेखक आनी पत्रकार विनायक होगाडे संमेलनाचे उद्घाटक म्हूण हाजीर आसतले. तशेंच संमेलनाध्यक्ष जोफा गोन्साल्वीस उपस्थीत आसतली, अशें गोवा कोंकणी अकादेमीचे अध्यक्ष वसंत सावंत हांणी सांगलें.
हे कार्यावळी विशीं म्हायती दिवपा खातीर कोंकणी अकादेमीन पणजे पत्रकार परिशद घेतिल्ली. ह्या वेळार अकादेमीचे अध्यक्ष वसंत सावंत, अधिकारी दत्तराज नायक, रोजरी म्हाविद्यालयाचे प्राध्यापक डॉ. डेनीस वाझ आनी रोमन रॉड्रीग्स हाजीर आशिल्ले.
सावंत हांणी सांगलें, पयल्या दिसा सकाळच्या 10 वरांचेर उक्तावण सुवाळो रोजरी पॅरीश हॉलांत जातलो. ह्या सुवाळ्याक युवा लेखक ब्रिजेश शेट देसाय हाच्या ‘पथरंग’ ह्या पथनाट्य पुस्तकाचें प्रकाशन जातलें. तशेंच जयेश अर्जून राऊत हांकां युवा साहित्यीक पुरस्कार भेटयतले आनी ताची मुलाखत घेतले. ते उपरांत साहित्यीक आनी शिक्षक अनंत अग्नी हांचें बीज भाशण जातलें. युवा लेखकांक तांचें साहित्य सादरीकरण करपाची संदूय ह्या संमेलनांत मेळटली. राजदीप नायक आनी विली गोयश, ‘पडवेर’ कार्यावळीक हाजीर रावून युवकां कडेन संवाद सादतले, अशी म्हायती सावंत हांणी दिली. दुसऱ्या दिसा, सकाळच्या 9 वरांचेर कथा, कविता, बालसाहित्य आनी पुस्तक समिक्षा ह्या चार साहित्य प्रकारांचेर कार्यशाळे वरवीं युवा लेखकांचें मार्गदर्शन मेळटलें. कथा विभागांत जयंती नायक, देविदास कदम आनी रामनाथ गावडे, कविता विभागांत पूर्णानंद च्यारी, ग्वादालूप डायस, प्रकाश दत्ता नायक, बालसाहित्य विभागांत नयना आडारकार, चेतन आचार्य, रत्नमाला दिवकार, पुस्तक समिक्षा विभागांत सुशांत नायक, हनुमंत चोपडेंकार, शुभा कपील सिनाय वेलिंगकार हाजीर आसतलीं. दनपारच्या 2 वरांचेर समारोप सुवाळो जातलो. ह्या सुवाळ्याक मुखेल सोयरे म्हूण मुकेश थळी हाजीर आसतले, अशें सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
