भांगरभूंय | प्रतिनिधी
खबरां संस्था
ढाकाः न्यूझिलंडान 15 वर्सां उपरांत बांगलादेशाक तांच्या घरच्या मैदानार दुसरे वन-डेंत 86 धांवड्यांनी हारयलें. 39 धांवड्यो दिवंन 6 विकेटी घेवपी लेगी स्पीनर ईश सोदी मॅन ऑफ दी मॅच थारलो. न्यूझिलंडाच्या डावांत ताणे 35 धांवड्योय केल्ल्यो. ढाकांतली ही मॅच जिखून न्यूझिलंडान बांगलादेशांतली आपले हाराची माळ तोडली. बांगलादेशांत 2008 वर्सा ताणी निमाणे जैत मेळयल्लें. ते उपरांत तांका सेगीत 7 मॅचींत हार खावची पडिल्ली.
3 मॅचींचे हे वन-डे माळेंत न्यूझिलंडान 1-0 अशी आघाडी घेतल्या. पयली वन-डे पावसाक लागून सोडून दिवची पडिल्ली. तिसरी वन-डे 26 सप्टेंबराक ढाकांत जातली. ढाकांतल्या शेर ए बांगला नॅशनल स्टेडियमाचेर टॉस जिखून पयलीं बॅटिंग करपी न्यूझिलंडाची सुरवात बाबत जाली. पयल्या 36 धांवड्यांत ताच्यो तीन विकेटी पडल्यो. फिन एलन (12), विल यंग (0) आनी चड बॉव्स (14) सवाय भितर आवट जाले. हॅन्री निकोल्स आनी टॉम ब्लंडेलान न्यूझिलंडाचो डाव साल्वार केलो. तांणी 95 धांवड्यांची भागिदारी केली. निकात्सान 49 धांवड्यो केल्यो. रचिन रवींद्र 10 धांवड्याचेर एलबीडब्ल्यू जालो. विकेटकीपर ब्लंडेलान 68 धांवड्यो केल्यो. कोकोन्ची (20), सौदी (35), जेमिनस (20) आनी लॉकी फर्ग्यूसन (13) हांणी 49.2 ओव्हरींत पंगडाच्यो 254 धांवड्यो केल्यो. खालेद अहमद आनी मेहंदी हसनान दरेकी 3 विकेटी घेतल्यो.
255 धांवड्याचो फाटलाव करतना बांगलादेशाचीय सुरवात बाबत जाली. कॅप्टन लिट्टन दास (6), तमीम इक्बाल, तजीद हसन, सौम्या सरकार आनी तौहीद सवाय भितर आवट जाले. महमूदुल्लान 49 धांवड्यो करून डाव साल्वार करपाचो यत्न केलो. मेहदी हसन (17) वांगडा ताणे 42 धांवड्यांची भागिदारी केली. 149 धांवड्यांत तांचे सात गडी आवट जाले. उपरांत 168 धांवड्यांत तांचो डाव सोपलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
