भांगरभूंय | प्रतिनिधी
खबरां संस्था
मुंबयः इंडियन प्रीमियर लीगान (आयपीएल) आयतारा 15 वर्सांत 1 हजार मॅचींचो प्रवास पुराय केलो. मुंबयच्या वानखेडे मैदानार राजस्थान रॉयल्स आनी मुंबय इंडियन्स हाचे मदली मॅच सर्तींतली 1 हजारावी मॅच आशिल्ली. निमाणे ओव्हरींत सेगीत 3 सके मारून डेव्हिडान ती मुंबय इंडियन्सान जिखून दिली.
आयपीएलांतल्या एक हजार मॅचींत आतां मेरेन 2 लाख 94 हजार 833 धांवड्यो जाल्यात. तातूंत 1,474 खेळगड्यांक संद मेळ्ळी. सर्तींत आतां मेरेन 26 हजार 711 चौके आनी 11 हजार 302 सके मारल्यात. आतां मेरेन 14 मॅचीचे निकाल सुपर ओव्हरींत लागले आनी 5 मॅची निकाला विणे उरल्यो.
मुंबय 5 फावट वस्ताद
मुंबय इंडियन्स पंगडांत सगल्यांत चड पांच फावट आयपीएल वस्ताद जावपाचो तशेंच सगल्यांत चड 135 मॅची जिखपाचो पराक्रम केला. चेन्नस सुपर किंग्ज 4 फावट जैतिवंत थारला. तांणी 218तल्यो 126 मॅची जिखल्यात. हार- जैत गुण क्रमवारींत सगल्यांत सकल कोची टस्कर्स केरळाचो पंगडा आसा. ह्या पंगडात 14तल्यो फकत 6 मॅची जिखल्यात.
आतां मेरेन 78 शेंकडे
आयपीएलाच्या विक्रमा विशीं उलोवपाचें जाल्यार 1 हजार मॅचींत 2 लाख 94 हजार 833 धांवड्यो जाल्यात. हातूंत 1474 खेळगड्यांनी पदार्पण केलें. ताणी 26,711 चौके आन 11,302 सके मारल्यात. इतलेंच न्हय तर सर्तींत आतां मेरेन 10,614 विकेटी पडल्यात.
सर्तीच्या इतिहासांत आतां मेरेन 78 शेंकडे आनी 1509 अर्द शेंकडे जाल्यात. आयपीएलाच्या 1000वे मॅचींत राजस्थान रॉयल्साचो ओपनर यशस्वी जयस्वालान 78 वो शेंकडो केलो. बॉलरांनी 353 मेडन ओव्हरी घातल्यो. 1195 बॅट्समन शून्याचेर आवट जाले. आनी 29 फावट पांचा परस चड विकेटी घेवपाचो पराक्रम जालो. 14 आयपीएल मॅची सुपर ओव्हरींत
15 वर्सांत आयपीएलाच्यो 1 हजार मॅची जाल्यो. जाल्यार टॉप 12 टॅस्ट मॅची खेळपी देशांनी ह्या तेंपांत फकत 911 टी-20 मॅची जाल्यो. आयपीएलांत आतां मेरेन 14 मॅची टाय जाल्यो जाल्यार आंतरराष्ट्रीय 911 टी-20 मॅचींत 16 मॅची टाय जाल्यात.
टॅस्ट मॅची खेळपी 12 देशांत टी-20त सगल्यांत उणो 45 स्कोर वेस्ट इंडिजाच्या नांवार आसा. आयपीएलांत सगल्यांत उणो स्कोर रॉयल चलेंजर्स- बंगळुरूच्या नांवार आसा. आरसीबीन 49 धांवड्यो केल्ल्यो. आंतरराष्ट्रीय टी-20त अफगाणिस्तानान 23 फेब्रुवारी 2019 दिसा डेहराडून हांगा आयर्ल्ंडा आड 3 बाद 278 धांवड्यो केल्ल्यो. आयपीएलांत सगल्यांत चड स्कोर करपाचो मान आरसीबी कडेन आसा. तांणी 2013 वर्सा बंगळुरूंत पुण्या आड 5 बाद 263 धांवड्यो केल्ल्यो.
विराटाच्यो चड धांवड्यो
आयपीएलांत सगल्यांत चड धांवड्यो करपाचो मुकूट आरसीबीचो आदलो कॅप्टन विराट कोहली कडेन आसा. ताणे 231 मॅचींतल्या 223 डावांत 129 परस चड स्ट्रायक रेटान 6957 धांवड्यो केल्यात. ताच्या नांवार 5 शेंकडे आनी 49 अर्द शेंकडे आसात. हे वळेरेंत दुसरें नांव पीबीकेएसाचो कॅप्टन शिखर धवनाचें आसा. ताणे 212 मॅचींत 211 डावांत 127.17च्या स्ट्राकय रेटान 6506 धांवड्यो केल्यात. धनवाच्या नांवार 2 शेकडे आनी 49 अर्द शेंकडे आसात. कोहली आनी धवना उपरांत दिल्ली कॅपिटल्साचो कॅप्टन डेव्हीड वॉर्नराचें नांव तिसरे सुवातेर आसा. ताणे 170 मॅचींत 139.41च्या स्ट्रायक रेटान 6187 धांवड्यो केल्यात. ताच्या नांवार 4 शेंकडे आनी 58 अर्द शेंकडे आसात.
ब्राव्होच्या नांवार चड विकेटी
आयपीएलांत सगल्यांत चड विकेटी घेतिल्ल्याचे वळेरेंत सीएककेचो आदलो अश्टतासी खेळगडो ड्वेन ब्राव्होचें नांव पयले सुवातेर आसा. वेस्ट इंडिजाच्या ह्या बॉलरांत 161 मॅचींच्या 158 डावांत 17.05च्या स्ट्रायक रेटान 183 विकेटी घेतल्यात. ताणे 516 ओव्हरींत 7.67च्या इकॉनॉमीसयत 3903 धांवड्यो दिल्यात. राजस्थान रॉयल्साचो युजवेंद्र चहलान ब्राव्हो परस 5 विकेटी कमी घेतल्यात. चहलान 140 मॅचींतल्या 139 डावांत 178 विकेटी घेतल्यात. ताणे 508 ओव्हरी घालून 3903 धांवड्यो. सासिथ मलिंगा तिसरे सुवातेर आता. ताणे 122 मॅचींत 170 विकेटी घेतल्यात आनी 471 ओव्हरींत 3366 धांवड्यो दिल्यात.
धवनाचे सगल्यांत चड चौके
पीबीकेएसचो कॅप्टन शिखर धवन आयपीएलांत सगल्यांत चड चौके मारपाक आघाडेर आसा. ताणे 212 मॅचींत 734 चौके मारल्यात. ताणे 127.12च्या स्ट्रायक रेटान 6506 धांवड्यो केल्यात. चौके मारपाक डेव्हीड वॉर्नर दुसरे सुवातेर आसा. ताच्या नांवार 621 चौके आसात. कोहली तिसरे सुवातेर आसा.
सके मारपाचो विक्रम आरसीबीचो आदलो खेळगडो ख्रिस गेलच्या नांवार आसा. ताणे 142 आयपीएल मॅचींत 357 सके मारल्यात. 148.96च्या स्ट्रायक रेटना गेलान 4965 धांवड्यो केल्यात. तातूंत 6 शेकडे आनी 31 अर्द शेंकडे आसात.ताचे उपरांत आरसीबीचो आदले बॅट्समन एबी डिव्हिलियर्साचो नंबर लागता. ताणे 184 मॅचींत 251 सके मारल्यात. ताच्या नांवार 5162 धांवड्यो आसात. भारताचो कॅप्टन रोहित शर्मा तांच्या फाटल्यान आसा. ताणे आतां मेरेन 250 सके मारल्यात. 235 लीग मॅचींत ताणे 6063 धांवड्यो केल्यात. रोहिताच्या नांवार एक शेकडो आनी 41 अर्द शेंकडे आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
