भांगरभूंय | प्रतिनिधी
मुख्यमंत्री डॉ. सावंतः इनामां मेळिल्ल्या चित्ररथांची अंदूं मिरवणूक
भांगरभूंय । प्रतिनिधी
पणजीः 55 वे इफ्फीची तयारी पुराय जावपाक आयल्या. 15 नोव्हेंबर मेरेन सगलीं कामां जातलीं. हाचे उपरांत 18 तारखेक परतून कामाचो नियाळ घेतले. अंदूंचे इफ्फींत शिगमो आनी कार्निवालांत इनामां मेळिल्ल्या चित्ररथांची खाशेली परेड जातली, अशें मुख्यमंत्री डॉ. प्रमोद सावंत हांणी सांगलें.
मुख्यमंत्र्यान सोमारा वेगवेगळ्या खात्यां वांगडा इफ्फीच्या कामांचो नियाळ घेतलो. मुखेल सचीव डॉ. व्ही कांडावेलू, पुलीस म्हासंचालक आलोक कुमार आनी हेर अधिकारी हाजीर आशिल्ले.
इफ्फीचें उक्तावण 20 तारखेर डॉ. श्यामाप्रसाद मुखर्जी स्टेडियमांत जातलें. 22 तारखेर गोंय एंटरटेनमेंट सोसायटी (ईएसजी) ते कला अकादेमी मेरेन फिल्मां संबंदीत थीम बेस्ड चित्ररथ मिरवणूक जातली. अंदूं पयलेच खेपे वागातोराच्या पार्कींग वाठारांत ओपन एअर स्क्रिनींग जातलें. मिरामार दर्यादेगेर ओपन एअर स्क्रिनिंगांची सुविधा आसतली. ह्या दोनूय सुवातांर फुकट सिनेमा दाखयतले, अशें मुख्यमंत्र्यान सांगलें. हाचे भायर आयनॉक्स पणजी आनी मडगांव, मॅजीक मुव्ही फोंडें, सम्राट अशोक सिनेमाघरांनी इफ्फीच्या प्रतिनिधींक सिनेमा दाखयतले. कला अकादमींत फकत ‘मास्टर क्लास’ आनी ‘इन कॉन्वर्सेशन वीथ’ ह्या सत्रांचें आयोजन केलां. बांदोडकार फुटबॉल मैदानाचेर एक खाशेलें मैदान उबारतात. ईएसजी मुखार आशिल्ल्या सुवातेर खाणां आनी हस्तकलेचे स्टॉल उबारतले. तशेंच योगसेतू लागसार खाशेलें प्रदर्शन जातलें, अशेंय मुख्यमंत्र्यान सांगलें.
3659 प्रतिनिधींची नोंदणी
आतां मेरेन 3659 प्रतिनिधींनी इफ्फी खातीर नोंदणी केल्या. निमाण्या धा दिसांत नोंदणींचो आंकडो आनीक वाडटलो. सादारणपणान 8 ते 9 हजार प्रतिनिधी इफ्फी खातीर नोंद जातात. अंदूंचे इफ्फी खातीर राज्य सरकार सुमार 26 कोटी रुपया खर्च करतलें, अशीं म्हायती मुख्यमंत्र्यांन दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
