भांगरभूंय | प्रतिनिधी
गों य हेरिटेज महोत्सव येत्या 15 नोव्हेंबराक सुरू जातलो. तो 19 नोव्हेंबर मेरेन चलतलो. पांच दिसांच्या ह्या महोत्सवांत पणजी शारांतल्या 18 दायज जाग्यांचेर भोंवडी आसतली. ते निमित साबार कार्यावळी आयोजित केल्यात. ‘स्केच वॉक’ कार्यावळीत भाग घेवप्यांक संबंदीत सुवातींचेर चित्र काडपाची तजवीज केल्या. सगल्यांक गोंयचें पारंपरीक खाण, जिनसांचो आस्वाद घेवपाक मेळटलो. हो अणभव अविस्मरणीय असो आसतलो, हें वेगळें सांगपाक नाका. बाॅक द व्हाक (गायेचें तोंड) हांगा जमनी पोंदचे उदकाचे स्रोत, टनेल पळोवपाक मेळटलो. थंय आर्किटेक्स तल्लुला डा सिल्वा ह्या दायज थळाचो इतिहास, बांदावळ आनी हेर संबंदीत म्हायती दितली.
आमी कांपालाच्या भगवान महावीर गार्डनांत झाडां मदीं भोंवडी आयोजीत केल्या. सुकण्यांचीय म्हायती गोंय सुकणीं संवर्धन वावुरपी दितले, अशें ‘दायज भोंवडे’चे मुखेली जॅक सुखिजा हांणी दिली. पणजे तरातरांचीं दायज झाडां आसात. पाम, पायन आनी हेर झाडां आसात. विशेश म्हणल्यार पणजी शार सोडल्यार असलीं झाडां हेर कडेन नात. पर्यावरण मोगींनी हे भोंवडेंत वांटेकार जावचें, अशेंय तांणी सांगलें.
दायज म्हणल्यार फक्त घरां आनी स्मारकां न्हय. राज्यांत जैवविवीधताय आसा, ती पळोवपाक मेळटली. दायजाची दुर्दशा जाल्या ती दिसतली. ताचें संवर्धन, सांबाळ जावंक जाय, हाचीय जाणीव जातली, अशें आरती दास हांणी सांगलें. फाॅन्तेन्हास आनी कांपाल वाॅकाचे येजमान मुरली शंकरन (मेक इट हेपनाचे सहसंस्थापक) हांणी सांगलें, थळावी संस्कृती दिसतलीच, पूण महोत्सवांत वांटो घेवप्यांचो थळाव्यां कडेन संपर्क जातलो. जाणकार व्यक्ती ह्या थळांची काणयेच्या रुपान सगली म्हायती दितले.
स जिनसांचें गोंयचें पारंपरिक जेवण, तरातरांची पेयां चाखपाक मेळटलीं. तावेर्नाचोय लाव घेवपाक मेळटलो. साबार खेळ, गेमी जातल्यो, अशी म्हायती ‘सोल ट्रॅव्हलिंगा’चे संचालक वरुण हेगडे हांणी सांगलें. ह्या महोत्सवाची म्हायती दितना ‘वाॅकिंग टुर्सा’चे वांगडी हरीहर एस. एस. हांणी सांगलें, दोन वर्सां पयलीं हांवें ह्या महोत्सवांत वांटो घेतिल्लो. सगल्यांत लांब पूल, आर्क, फाॅन्तेन्हास आनी हेर कडलीं दायज थळां म्हाका पळोवपाक मेळ्ळीं. मिंगेल डायस आनी हेर जायत्या जाणांनी मार्गदर्शन केलें. म्हायती दिली.
मजगतीं, गोवा हेरिटेज फेस्टिव्हलाची वेबसायट आसा, ताचेर सगली म्हायती अपलोड करतले. तशेंच सोशल मिडियाचेरुय म्हायती दितले, अशें आयोजकांनी कळीत केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
