भांगरभूंय | प्रतिनिधी
पावस पावलो सरासरी 84.5 इंचांचेर
भांगरभूंय । प्रतिनिधी
पणजी : गोंयांत बिरेस्तारा पावसान नेटाची हाजेरी लायली. घोग्यांनी पडिल्ल्या पावसाक लागून कांय कडेन रस्त्याचेर उदक सांचिल्लें. गोंयांत 24 वरांस सरासरी 2.75 इंच पावसाची नोंद जाली. हे मजगतीं, म्हापश्यां 3.55 इंच जाल्यार पेडण्यां 3.51 इंच पावस पडलो. हवामान खात्यान 15 ते 19 ऑगस्ट मेरेन मध्यम स्वरुपाच्या पावसाची शक्यताय उक्तायल्या. ताका लागून ह्या पांच दिसां खातीर पावसाचो यलो अलर्ट जारी केला.
गोंयांत 20 ऑगस्टाक तुरळक स्वरुपाच्या पावसाची शक्यताय आसा. बिरेस्तारा पणजे चडांत चड तापमान 26.6 अंश जाल्यार उण्यांत उणे 23 अंश सेल्सियस तापमानाची नोंद जाली. मुरगांवां चडांत चड तापमान 26.2 अंश जाल्यार उण्यांत उणें 23.4 अंश सेल्सियस आशिल्लें. गोंयांत फुडले पांच दीस तापमान 28 ते 29 अंश जाल्यार उण्यांत उणें 24 अंश सेल्सियस आसपाची शक्यताय हवामान खात्यान उक्तायल्या. गोंयांत 1 जून ते 14 ऑगस्ट ह्या काळांत सरासरी 84.5 इंच पावसाची नोंद जाल्या. हे मजगतीं, धारबांदोड्यां सगल्यांत चड 112.65 इंच पावसाची नोंद जाल्या. जाल्यार सांग्यार 111 इंच, वाळपय 103.47 इंच, केप्यां 104.85 इंच, फोंड्यां 90.55 इंच, सांखळे 84.33 इंच आनी काणकोणां 80.68 इंच पावसाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
