भांगरभूंय | प्रतिनिधी
आमदार प्रेमेंद्र शेट : रो-रो फेरीचो प्रस्न सोडयतले
भांगरभूंय । प्रतिनिधी
दिवचल : चोडण रायबंदर रो-रो फेरी प्रस्नाचेर सरकार योग्य तोडगा काडटलें. जल मार्गा वयल्यान नेमान प्रवास करपी प्रवाशांक जावपी त्रास पयस करचे खातीर सरकारान ह्या मार्गार रो-रो फेरीबोटी सुरू केल्यात. मात हे विशीं कांय जाणांनी विवीध प्रस्न उपस्थीत केल्यात. थळाव्यांनी 15 ऑगस्ट मेरेन पासियेंस काडचें. हे विशीं योग्य उपाय आनी सगले प्रस्न निकालांत काडटले, अशी हमी आमदार प्रेमेंद्र शेट हांणी दिली.
शेनवारा आमदार तशेंच चोडण पंचायत मंडळ, थळावे लोक हांचे जोड बसकेंत विवीध प्रस्न चर्चेक आयले. सरकारान एक म्हयनो अभ्यास करून उपरांतूच तातूंतल्यो चुको आनी लोकांच्यो अपेक्षा हे विशीं निश्चीत उपाय काडटले, अशी हमी आमदारान ह्या वेळार दिली.
मुख्यमंत्री डॉ. प्रमोद सावंत, न्हंय येरादारी खात्याचे मंत्री सुभाष फळदेसाय हांचो रो-रो फेरीबोटी सुरू करपाक म्हत्वाचो वांटो आसा. तशेंच मयें मतदारसंघाचे आमदार प्रेमेंद्र शेट आनी हेरांनी विशेश यत्न केल्यात.
14 जुलयाक रो-रो फेरीबोटींचे उक्तावण जाल्लें. ते उपरांत जलमार्गा वयले येरादारीचो एका म्हयन्या उपरांतचो नियाळ घेतले. म्हयनो जावपाक अजून अठरा दीस उरल्यात. सध्या जलमार्गा वयल्या तिकेट दरा विशीं विवीध चर्चा चल्ल्यात. चड करून चोडणेंच्या लोकांक विवीध गजालींचेर सूट जाय. न्हंय येरादारी मंत्र्यांन जाहीर आस्वासन दिल्ल्यान आमी एक म्हयनो वाट पळोवपाक जाय. नाका जाल्ल्या चर्चांचेर लक्ष दिवचें न्हय. एक म्हयनो म्हणल्यार 15 ऑगस्ट मेरेन वाट पळोवया. तो मेरेन खंयच्याच चुकीच्या प्रचाराक बळी पडूं नाकात, असो उलो आमदार शेट हांणी मारलो. गैर वेवस्थापन पयस करपाक ही सेवा सुरू केल्या. हाका लागून 15 ऑगस्ट मेरेन विवीध गजालींचेर अभ्यास करून सगल्या प्रस्नांचेर उपाय काडटले. आपूण स्वता चोडणाचें शिश्टमंडळ घेवन मुख्यमंत्र्या कडेन चर्चा घडोवन हाडटलों, अशेंय आमदार शेट हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
