भांगरभूंय | प्रतिनिधी
पर्ये सांखळेश्वर देवस्थानाचो परंपरीक सप्ता पुलीस बंदोबस्तांत
भांगरभूंय । प्रतिनिधी
वाळपयः सत्तरीची उपजिल्होधिकारी पल्लवी मिश्रा हांणी पर्यें देवस्थान बंद दवरपाचो तशेंच त्या वाठारांत 144 कलम लागू करपाचो आदेश दिल्लो. तशेंच चार जाणांचेर गुन्यांव दाखल करपाची प्रक्रिया हातांत घेतिल्ल्यान शुक्रारा रातभर सुमार हजारभर सेवेकरी म्हाजनांनी ताका खर विरोध केलो. हाका लागून लोकांच्या चेपणाक लागून सत्तरी उपजिल्होधिकाऱ्यान दिल्लो आदेश फाटीं घेतलो. शेनवारा परंपरीक सप्ता उत्सव देवळांत मनयलो. तातूंत गांवकार म्हाजन गट आनी हेरांनी वांटो घेतलो. ह्या वेळार व्हड प्रमाणांत पुलीस बंदोबस्त दवरिल्लो. मजगतीं, शुक्रारा मध्यानरातीर पावलापावलार आडखळी निर्माण करून बंद केल्लो गोंय चोर्ला म्हामार्ग उपजिल्गोधिकाऱ्यान आपलो आदेश फाटीं घेतले उपरांत उक्तो केलो.
पर्येंच्या सांखळेश्वर देवस्थानाच्या वर्धापन दिसा निमतान उपजिल्होधिकाऱ्याचो आदेश आसून लेगीत माजीक गटाच्या चार जाणांनी फांतोडेर 5 वरांचेर पुजा केल्ली. हाका गांवाकर समाजान खर हरकत घेतिल्ली. तांचेर कारवाय करची हे खातीर गांवकार समाजाच्या म्हाजनांनी सत्तरी उपजिल्होधिकारी कार्यालया मुखार शुक्रारा निदर्शनां केल्लीं. आदेश मोडून पुजा केल्ल्यांचेर गुन्यांव दाखल करात अशी तांणी मागणी केल्ली. ते प्रमाण उपजिल्होधिकाऱ्यान पांच जाणांचेर गुन्यांव नोंद करपाचे निर्देश थळाव्या पुलिसांक दिल्ले. ते प्रमाण पांच जाणांचेर गुन्यांव दाखल केले. तशेंच शेनवारा जावपी परंपरीक सप्ता उत्सव आनी आयतारा जावपा आशिल्लो परंपरीक गवळण कालो मनयतना तणावाची परिस्थिती निर्माण जावची न्हय हे खातीर पर्ये देवस्थान वाठारांत 144 कलम लायिल्ले. तशेंच 24 डिसेंबर मेरेन देवस्थान बंद दवरपाचो आदेश दिल्लो.
शेनवारा सकाळीं सत्तरी उपजिल्होधिकारी कार्यालयांत उत्तर गोंयची जिल्होधिकारी स्नेहा गीते हांच्या मार्गदर्शना खाला विशेश बसकेचें आयोजन केल्लें. हे बसकेंत माजीक गटाचे प्रतिनिधी वांटेकार जाल्ले. ह्या वेळार विवीध पांवड्याचेर चर्चा केली. माजीक गटान 144 कलम फाटीं घेवचें, दाखल केल्ले गुन्यांव फाटीं घेवचे आनी देवस्थान बंद दवरपाचो आदेश फाटीं घेवचो, अश्यो मागण्यो दवरल्यो. त्यो सगळ्यो मागण्यो मान्य केल्यो. ह्या वेळार नवो आदेश दितना उपजिल्होधिकाऱ्यान देवस्थान बंद दवरपाचो आदेश फाटीं घेतलो, तशेंच 144 कलम काडटले अशें आपल्या आदेशांत स्पश्ट केलें.
बसके उपरांत घेतिल्ले पत्रकार परिशदेंत माजीक गटाच्या प्रतिनिधींनी सांगलें, बसकेंत केल्ल्यो सगळ्यो मागण्यो मान्य केल्यात. शेनवारा सांजे वेळार जावपी परंपरीक सप्ता सुवाळ्यांत सगळे वांटेकार जातले. ह्या सुवाळ्यांतल्यान कोणाकूच वगळचे नात. दाखल केल्ले गुन्यांव फाटीं घेवपाचें आस्वासन अधिकाऱ्यांनी दिलां, अशें तांणी सांगलें.
परंपरीक सप्ता मनयलो
परंपरीक सप्ता उत्सव शेनवारा सांजे वेळार उमेदीन मनयलो. तातूंत गांवकार समाज सोडून हेरांनी वांटो घेतलो. विधीवत पुजा करून उत्सव मनयलो. ते उपरांत देवीची व्हट भरप, भजन किर्तन अश्यो परंपरीक कार्यावळी जाल्यो. ह्या वेळार व्हड प्रमाणार पुलीस बंदोबस्त दवरिल्लो.
म्हामार्ग दनपारां उक्तो
शुक्रारा मध्यानरातीर आंदोलकांनी सांखळी चोर्ला म्हामार्ग पर्यें वाठारांत फातर घालून आडायल्लो. हाका लागून येरादारी होंडा मार्गान मोर्लें केरी अशी घुंवडायल्ली. शेनवारा उपजिल्होधिकाऱ्यान आदेश फाटीं घेतले उपरांत म्हामार्ग उक्तो केलो. सध्या ह्या मार्गार कसलीच आडखळ ना. ह्या मार्गा वयल्यान येरादारी सुरू केल्या, अशी म्हायती पुलीस उपअधिक्षक जिवबा दळवी हांणी दिली.
परिस्थिती तणावा खालाच
नवो आदेश आयले उपरांत खुबळिल्ल्या गांवकार म्हाजन गटाच्या समर्थकांनी दनपारां परतून एकदां उपजिल्होधिकाऱ्याची भेट घेवपाचो यत्न केलो, मात तांची भेट जावपाक शकली ना. ते उपरांत पत्रकारां कडेन उलयतना गांवकार समाजाच्या प्रतिनिधींनी सांगलें, पर्यें वाठारांत जी तणावाची परिस्थिती निर्माण जाल्या तिका उपजिल्होधिकारीच जापसालदार आसा. सगळ्यांनी मेळून हो उत्सव मनोवचो असो आदेश उपजिल्होधिकाऱ्यान दिल्लो. मात ताच्यो प्रती शेनवारा दनपारां वांटल्यो. जर ह्यो प्रती 18 डिसेंबराक मेळिल्ल्यो जाल्यार अशी परिस्थिती निर्माण जावची नाशिल्ली, अशें तांणी सांगलें.
परिस्थिती नियंत्रणा खालाः जिवबा दळवी
सध्यातरी पर्यें वाठारांतली परिस्थिती पुराय नियंत्रणा खाला आसा. परंपरीक सप्ता उत्सव सगळ्यांनी उमेदीन मनयलो, कसलोच गोंदळ जावंक ना. देवस्थाना कडेन व्हड प्रमाणांत पुलीस बंदोबस्त दवरला. आयतारा गवळण कालो जावपाचो आसा. ते खातीर परतून एकदां परिस्थिती हाता भायर वच्ची न्हय हे खातीर रातभर थंय पुलीस बंदोबस्त आसतलो, अशें जिवबा दळवी हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
