भांगरभूंय | प्रतिनिधी
नवी दिल्ली, खबरां संस्था : विरोधी पक्षांच्या ‘इंडिया’ आघाडीन राष्ट्रीय खबरां चॅनलांच्या 14 खबरां निवेदकांचेर बहिश्कार घालपाच्या निर्णयाचो न्यूज ब्रॉडकास्टिंग अँड डिजिटल असोसिएशनान (एनबीडीए) निशेध केला. ह्या निर्णयान घातक प्रथा सुरू जाल्या, अशी टिकाय तांणी पत्रकांत केल्या. एनबीडीएन बहिश्काराच्या निर्णया विशीं दुख्ख आनी हुस्को उक्तायला.
‘भारतांतल्या मुखेल खबरांकारांच्या कार्यावळींचेर बहिश्कार घालपाचो प्रकार लोकशायेच्या तत्वां आड आसा. हाका लागून असहिष्णुताय दिसून येता आनी प्रसार माध्यमांचें स्वातंत्र्य धोक्यांत पडटा,’ अशें निवेदनांत म्हणलां. तशेंच भारताक परतून आणिबाणी वेळा वयले स्थितींत व्हरपाचो हो एक प्रकार अशी टिका एनबीडीएन केल्या.
विरोधी पक्षांची आघाडी बहुतत्त्ववाद आनी मुक्त माध्यमांचो पुरस्कार आशिल्ल्याचो दावो करता, पूण तांचो बहिश्कार करपाचो निर्णय विचार आनी मतां मेकळेंपणान मांडपाच्या लोकशायेच्या सगळ्यांत मुळाव्या हक्काचो सन्मान करीना, असो आरोप एनबीडीएन केला. कांय पत्रकार आनी खबरां पत्रकारांचेर बहिश्कार घालपाचो निर्णय फाटीं घेवचो, अशी विनवणी एनबीडीएन केला.
14 पत्रकार
इंडियाच्या सगल्या घटक पक्षांनी हो बहिश्काराचो निर्णय १३ सप्टेंबराक जाल्ले बसकेंत घेतला. ह्या पत्रकारां मदीं आदित्य त्यागी, अमन चोप्रा, अमिश देवगण, आनंद नरसिंहन, अर्णब गोस्वामी, अशोक श्रीवास्तव, चित्रा त्रिपाठी, गौरव सावंत, नाविका कुमार, प्राची पराशर, रुबिना लियाकत, शिव अरुर, सुधीर चौधरी, सुशांत सिन्हा हांचो आसपाव आसा.
मजगतीं, भाजपान 14 वेर हे घडणुकेचो खर निशेध केल्लो. इंडिया हे घमेंडी आघाडेच्या घटक पक्षांनी कांय पत्रकारांचे बहिश्कार घाला, तांकां धमकी दिवपाचो प्रकार केला, ताचो आमी निशेध करतात, अशें पत्रक तांणी केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
