13 हजार वर्सां आदीं नामशेष जाल्ले लांडगे परतून जल्माक आयले

भांगरभूंय | प्रतिनिधी

वॉशिंग्टन, खबरां संस्था ः अमेरिकन शास्त्रज्ञांनी नामशेष जाल्ली लांडग्यांची प्रजाती डायर वुल्फ परतून जिवीत करून इतिहास घडयला. अमेरिकेंतल्या डलास शारांतली बायोटेक कंपनी कोलोसल बायोसायन्सेसान हें येस मेळयलां.
पोरणें डीएनए, क्लोनिंग आनी जीन एडिटिंग तंत्रांचो उपेग करून 13 हजार वर्सां आदीं नामशेष जाल्ल्या डायर वुल्फ प्रजातीचे तीन लांडगे तयार केल्यात. तातुंत दोन नर आनी एक मादी आसा.
डायर वुल्फ लांडगे व्हडले शिकारी लांडगे आशिल्ले. आयच्या ग्रे लांडगे परस तांचो आकार व्हड, बळिश्ट आनी थंड वाठारांनी रावपाक सक्षम आसा. तांची तकली रूंद, जबडे घट आनी केंस दाट आनी धवे आशिल्ले. उत्तर अमेरिकेंतल्या रानांत ही जात सगळ्यांत धोक्याची शिकारी आशिल्ली.

72 हजार वर्सां पोरणें डीएनएतल्यान डायर लांडग्याचो पुनर्जन्म
कोलोसल बायोसायन्सेसांतल्या शास्त्रज्ञांनी ओहायोच्या शेरिडन गुहेतल्या 13 हजार वर्सां पोरणें दांतांतल्यान आनी इडाहोच्या 72 हजार वर्सां पोरणें कवटींतल्यान डीएनए काडलें. तातुंतल्यान डायर लांडग्याचे दोन उच्च दर्जाचे जीनोम तयार केलें. उपरांत ह्या जीनोमाची जुळोवणी ग्रे लांडगो, कोलो हांच्या जीनोमांकडेन केली. जाका लागून भिरांकूळ लांडग्याची खाशेलपणां वळखुपाक येतली. जशीं धवी फर आनी लांब, दाट केंस. हाचे उपरांत CRISPR जीन एडिटिंग तंत्रज्ञान वापरून ग्रे लांडग्याच्या पेशींत 20 आनुवंशिक बदल केलें. ह्या संपादीत पेशींतल्यान भ्रूण तयार करून मिश्र जातीच्या शिकारी लांडग्यांच्या गर्भाशयांत प्रत्यारोपित केले. हाचे उपरांत रोम्युलस आनी रेमस ह्या दोन नर पिलांचो जल्म 1 ऑक्टोबर 2024 दिसा जालो. उपरांत 30 जानेवारी 2025 दिसा खालीसी ह्या मादी पिलांचो जल्म जालो.

बायोटेक कंपनी कोलोसल बायोसायन्सेसाच्या म्हणण्या प्रमाण, ही पिलां फकत प्रदर्शना खातीर आसतली. तांकां भुरगीं जावंक दिवचें नात. सध्या ह्या तीन पिलांक 2 हजार एकर गुप्त वाठारांत दवरल्यात. ह्या वाठारा भोंवतणीं 10 फूट उंचायेचे कुंपण आसा. ही सुवात अमेरिकेच्या शेतकी खात्याकडेन नोंद जाल्या. ताचे सुरक्षे खातीर ड्रोन, कॅमेरे आनी सुरक्षा कर्मचारी तैनात केल्यात. कोलोसलान 2021 वर्सा मॅमथ, डोडो आनी तस्मानियन वागांचें पुनरुत्पादनाचें काम सुरू केलें, पूण डायर लांडग्यावेले तांणी केल्ले काम आतां मेरेन गुपीत दवरिल्लें.