13 कोटी 50 लाख भारतीयांची गरिबी सोंपली
भांगरभूंय | प्रतिनिधी
भांगरभूंय । खबरां संस्था
नवी दिल्ली ः देशांतले १३ कोटी ५० लाख लोक २०१५-१६ ते २०१९-२१ ह्या पांच वर्सांत गरिबींतल्यान भायर सरल्यात. ह्या काळांत बिहार (१८.१३%), मध्य प्रदेश (१५.९४%), उत्तर प्रदेश (१४.७५%), ओडिशा (१३.६५%) आनी राजस्थान (१३.५६%) ह्या राज्यांनी गरीब लोकांचो आंकडो सगळ्यांत वेगान उणो जाला. गरिबी उणी करपाच्या मळार महाराष्ट्र अजून फाटीं आसा.
निती आयोगान सोमारा जाहीर केल्ल्या अहवाला प्रमाण, भारतांत गरीब लोकांचो आंकडो ९.८९% टक्क्यांनी उणो जाला. २०१५-१६ वर्सा हो आंकडो २४.८५% आशिल्लो. तो २०१९-२१ वर्सा १४.९६% मेरेन देंवलो. राष्ट्रीय एमपीआय (बहुआयामी गरिबी निर्देशांक) भलायकी, शिक्षण आनी जिणेचो दर्जो ह्या तीन सामान्य आयामां वांगडा वंचितपणूय मेजता. त्या आयामांचें प्रतिनिधित्व १२ शाश्वत उदरगत ध्येय (एसडीजी) कडेन संबंदीत निर्देशकां वरवीं केलां. गांवगिऱ्या वाठारांनी गरीब लोकांचो आंकडो ३२.५९ टक्क्यां वयल्यान १९.२८ टक्क्यांचेर पावला, अशें अहवालांत म्हणलां. शारांतल्या गरीब लोकांचो आंकडो ८.६५% वयल्यान ५.२७% जाला.
अहवाला प्रमाण, ५ वर्सांत एमपीआय मोल ०.११७ वयल्यान ०.०६६ मेरेन उणें जालां आनी २०१५- १६ ते २०१९- २१ ह्या काळांत गरिबीची तीव्रता ४७ टक्क्यां वयल्यान ४४ टक्के जाल्या. हाका लागून भारत २०३० वर्साच्या लक्ष्य काळाच्या बरोच आदीं 1.2 (गरिबी उणींच अर्दी करपाचें ध्येय) साध्य करतलो, हातूंत मात्तूय दुबाव ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
