भांगरभूंय | प्रतिनिधी
अशोक सराफाक कृतज्ञता पुरस्कारान करतले भोवमानीत
पणजी: अंदूंचो 13वो गोवा मराठी चित्रपट महोत्सव 5 ते 7 ऑगस्ट अशे तीन दीस मनरिजवण संस्था आनी आयनॉक्सांत मनयतले. ह्या वेळार मराठी चित्रपट सृश्टीचे ज्येश्ठ अभिनेते अशोक सराफ हांकां कृतज्ञता पुरस्कारान भोवमानीत करतले अशी म्हायती उदय म्हांबरो हांणी पत्रकार परिशदेंत दिली.
ह्या वेळार तांचे सयत विन्सन वर्ल्डचे संजय शेट्ये, श्रीपाद शेट्ये, सिद्धी म्हांबरो, सचीन चाटे, श्रद्धा पाटील हाजीर आशिल्ले
कोविडाक लागून फाटलीं दोन वर्सा गोंयांत मराठी चित्रपट महोत्सव मनोवंक मेळ्ळो ना. ताका लागून ह्या वर्सा 13वो चित्रपट महोत्सव व्हड उमेदीन मनयतले. ह्या महोत्सवाच्या उक्तावणाक मुखेल सोयरे म्हूण हिंदी सिने सृश्टीतली अभिनेत्री रविना टंडन हांची हाजेरी आसतली. तशेंच खासा मुख्यमंत्री डॉ. प्रमोद सावंत हाजीर रावतले.
ह्या वर्सा महोत्सवांत खूबशा प्रिमियरा सयत 20 परस चड चित्रपट प्रदर्शीत करतले. ह्या महोत्सवांत मराठी सृश्टीतले खूबशे कलाकार हाजीर रावतले. हातूंत सोनाली कुलकर्णी, सुबोध भावे, नेहा पेंडसे, सई ताम्हणकर, अमेय वाघ, किशोर कदम, मृण्मयी गोडबोले, संजय जाधव, सुहरुद गोडबोले, सचीन कुंडलकर, आदित्य सरपोतदार, अनंत महादेवन, प्रसाद ओक, गजेंद्र अहिरे अशा खूबशा कलाकारांचो आस्पाव आसा.
ह्या महोत्सवांत खूबशे सिनेमा प्रदर्शीत जातले. हातूंत अनंत महादेवनाचो कडू गोड, तेच प्रमाण गोदावरी, पोत्रा, कारखानीसाची वारी, तीच शहर. तेच प्रमाण संजय जाधव हांचो तमाशा लाईव्ह, मृणाल कुलकर्णी हांचो सहेला रे, सचीन कुंडलकरांचा पाँडिचेरी, गजेंद्र अहिरे हांचो गोदाकाट, निपूण धर्माधिकारी हांचो मी वंसतराव आनी गोंयची निर्मिती आशिल्लो बर्लीन फिल्म फेस्टिव्हलांत प्रिमियर जाल्लो स्थळ पुराण हो सिनेमा प्रदर्शीत जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.