भांगरभूंय | प्रतिनिधी
केंद्रीय राज्यमंत्र्या हस्तुकीं रोजगार मेळा उपक्रमा खाला वाटलीं नियुक्ती पत्रां
पणजी: सरकारी नोकर्यांनी नवेच नियुक्त जाल्ले उमेदवार राष्ट्र उभारणीच्या वावरांत मोलादीक भुमिका करतले अशी अपेक्षा आसा. देशांत उद्देगीक, अर्थीक आनी समाजीक मळार पायाभूत सुविधा घटमूट करपाच्या कार्यांत तांचो आसपाव आसतलो, अशें केंद्रीय मंत्री श्रीपाद नायक हांणी म्हणलें.
केंद्रीय पर्यटन, बंदरां, शिपींग आनी उदकामार्ग राज्यमंत्री श्रीपाद नायक हांणी इन्स्टिट्यूट मिनेझीस ब्रागांझा सभाघर, पणजी हांगा आयोजीत कार्यावळींत केंद्र सरकाराच्या 6 व्या रोजगार मेळा उपक्रमा खाला सरकारी नोकर्यांनी नव्यान नियुक्त जाल्ल्या 126 उमेदवारांक नियुक्ती पत्रांचें वाटप केलें. केंद्र सरकाराच्या भरती प्रक्रियेचो एक भाग म्हणून रोजगार मेळा उपक्रमा खाला देशभर सरकारी नोकर्यांनी उमेदवारांची भरती करता. प्रधानमंत्री नरेंद्र मोदी हांणी सरकारी नोकर्यांनी नव्यान नियुक्त जाल्ल्या उमेदवरां कडेन व्हिडीओ कॉन्फरन्सींग वरवीं संबोधन केलें.
रोजगार अभियान हो पारदर्शकता आनी सुशासनाचो पुरावो आशिल्ल्याचें सांगून प्रधानमंत्री मोदी हांणी नवेच भरती जाल्ल्या उमेदवारांक देशांतल्या नागरिकां खातीर संवेदनशीलपणान काम करपाक आनी नवें नवें शिकत रावपाक सांगलें. अमृत काळाच्या 25 व्या वर्सांत भारताचे उदरगतीचें सपन साकार करपाचे दिकेन चालीक लागचें असो उलो तांणी मारलो.
गोंयांत स्टेट बँक ऑफ इंडिया (64 उमेदवार), बँक ऑफ महाराष्ट्र (14 उमेदवार), रेल्वे (30 उमेदवार), कस्टम (8 उमेदवार) आनी केंद्रीय वस्तू आनी सेवा कर विभाग (8 उमेदवार) ह्या उमेदवारांक नियुक्ती पत्रां भेटयलीं. तशेंच केंद्रीय कामगार मंत्रालय आनी संरक्षण मंत्रालयान दरेकी एका उमेदवाराची नियुक्त केली.
अमृत काळाच्या फुडल्या 25 वर्सांतली नवे नियुक्ते केल्ल्या उमेदवारांची सेवा ‘नव भारत-विकसित भारताची’ बुन्याद घटमूट करपा खातीर उपेगी थारतली, अशें केंद्रीय मंत्री नायक हांणी फुडें म्हणलें.
हे कार्यावळीक स्टेट बँक ऑफ इंडियाचे मुखेल म्हावेवस्थापक अरविंद कुमार सिंह, स्टेट बँक ऑफ इंडियाचे उपमहावेवस्थापक विकास बासुमातरी, के. एम नंदकुमार हाजीर आशिल्ले.
रोजगार मेळा उपक्रमा खाला प्रधानमंत्री नरेंद्र मोदी हांणी पुराय भारतांतल्या सरकारी विभाग आनी संस्थांनी नव्यान भरती जाल्ल्या सुमार 70,000 उमेदवारांक नियुक्ती पत्रांचें वाटप केले. देशभरात 43 कडेन रोजगार मेळ्याचें आयोजन केल्ले. केंद्र सरकाराचे साबार विभाग तशेंच राज्य आनी संघप्रदेश सरकारांकडल्यान ह्या भरती उपक्रमांक सहकार्य मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
