भांगरभूंय | प्रतिनिधी
पणजी : गोंय कर्मचारी भरती आयोगा वतीन जावपी एलडीसी पदां खातीरची सीबीटी – 3 परिक्षा 1215 उमेदवार दितले. एससी, एसटी, ओबीसी ह्या गटां खातीर आयोगान उमेदवारांची निवड केल्या. परिक्षा 23 मार्च 2025 दिसा जातली. परिक्षेचें वेळापत्रक, थळ वॅबसायटी वरवीं जाहीर जातलें.
एलडीसीची 232 आनी ज्युनियर स्टेनोग्राफराची 53 पदां भरपा खातीर आयोगान नोव्हेंबरांत जायरात दिल्ली. सीबीटी – 2 परिक्षा घेतले उपरांत आयोगान निकाल जाहीर केलो. गुणां विशीं कागाळी वा हरकती सादर करपाक उमेदवारांक मुजत दिली. हरकती आनी कागाळींचो विचार केले उपरांत आयोगान सीबीटी – 3 परिक्षे खातीर पात्र थारिल्ल्या उमेदवारांची वळेरी जाहीर केल्या. गोंय कर्मचारी आयोगाच्या वॅबसायटीचेर ही वळेरी आसा.
एलडीसीच्या 232 पदां पैकीं 129 पदां सर्वसामान्य गटांत आसा. सर्वसामान्य गटांत 645 उमेदवार परिक्षा दितले. एसटी (अनुसुचीत जमाती) खातीर 27 पदां आसात. एसटीच्या गटांत 135 उमेदवार परिक्षा दितले. एससीच्या 2 सुवातां खातीर 10 उमेदवार आसात. ओबीसीच्या 52 सुवातां खातीर 260 जाल्यार अर्थीक मागास गटांत (इडब्लूएस) 22 पदां खातीर 110 उमेदवार आसात. विकलांग (डिजेबिलिटी) गटांत 42, खेळगड्यांच्या गटांत 5 जाल्यार सैन्यदळाच्या (एक्स सर्वीसमेन) गटांत 8 उमेदवार आसात.
विकलांगाच्या गटांतल्या 42 उमेदवारां पैकीं 17 उमेदवारांक सारखे दिसना (लो वीजन). 6 उमेदवारांक आयकूंक आनी उलोवंक उणें येता. बौद्धीक उणाव आशिल्ले 4 उमेदवार आसात. अॅसीड हल्लो, लेप्रसी सारखी दुयेंसा आशिल्ले 15 उमेदवार आसात.
आयोगान गटा प्रमाण वर्गवारी करून वळेरी जाहीर केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
