भांगरभूंय | प्रतिनिधी
पणजी : गोंयांत एक धपको दिवपी प्रकार उजवाडाक आयला. 17 कोटी रुपयांच्या बँक घोटाळ्याचो मास्टरमायंड आनी फाटलीं 12 वर्सां पुलिसांची फटवणूक करपी आशुतोष पंडित निमाणो सीबीआयक सांपडलो. हो गुन्यांवकार आपली वळख बदलून ‘यतीन शर्मा’ म्हणून गोंयांत वावुरतालो. अर्थीक घोटाळ्यांचो हो नवो ‘चार्ल्स शोभराज’ निमाणे आधुनीक तंत्रगिन्यानांत सांपडलो आनी सीबीआयन बांबोळे धाड घालून ताका अटक केल्या.
ताचो संबंद 2013 वर्सा पुण्यांत जाल्ल्या व्हड बँक घोटाळ्या कडेन आसा. पुण्यांतल्या ‘हावस ऑफ लॅपटॉप्स’ कंपनीच्या संचालकान इंडियन ओव्हरसीज बँकेंत 17 कोटी रुपयांची फटवणूक केल्ली. मुंबय पुलिसांच्या अर्थीक गुन्यांव फांट्यान ह्या प्रकरणाची चवकशी सुरू केली आनी उपरांत ती केस सीबीआय कडेन दिली. पूण ताचे पयलींच आशुतोष पंडित हो मुखेल दुबावीत फरारी जाल्लो. 2018 वर्सा न्यायालयान ताका ‘फरारी गुन्यांवकार’ म्हूण जाहीर केल्लो, पूण तो नेमको खंय आसा हे कोणाकूच खबर नाशिल्लें.
आशुतोश खूब हुशारीन गोंयांत रावतालो. बांबोळे रावतना ताणें आपली पोरणी वळख पुरायपणान पुसली. ताणें फकत आपलें नांवूच बदललें ना, जाल्यार सरकारी यंत्रणेक फटोवन ‘यतीन शर्मा’ ह्या नांवान बनावट आधार कार्ड, पॅन कार्ड आनी दोन फावटीं पासपोर्ट लेगीत मेळयलो. ह्या बनावट कागदपत्रांच्या आदारान ताणें आपलें नवें साम्राज्य गोंयच्या नाईटलायफांत उबारलें. आंतरराष्ट्रीय पांवड्यार फामाद आशिल्ल्या बागा- कळंगूटेच्या ‘हॅमर्स’ ह्या नायट क्लबाचो तो सीईओ आनी भागीदार म्हूण काम करतालो. शेजाऱ्यां खातीर तो एक संस्कृत आनी प्रतिश्ठीत नागरीक आशिल्लो, पूण ताच्या फाटल्यान एक गुन्यांवकाराचें तोंड लिपिल्लें.
12 वर्सां पसून चालू आशिल्लो हो घोटाळो निमाणो ‘नॅटग्रीड’ (NATGRID) ह्या डिजिटल गुप्तचर प्रणालीक लागून उक्ताडार आयलो. हे पद्दतीन आशुतोषाच्या डेटा पॅटर्नांत सूक्ष्म विसंगती सोदून काडली आनी गोंयांतल्या बांबोळे कडेन ताचे संबंद सोदून काडले. सीबीआयच्या पंगडान सापळो रचून ताच्या घराचेर धाड घाली तेन्ना ताची बनावट वळख कळ्ळी. हे कारवायेक लागून गोंयच्या नायट क्लब वेवसाय आनी गुन्यांवकारी जगांत व्हड बोवाळ निर्माण केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
