भांगरभूंय | प्रतिनिधी
पेडणें ः पेडणें तालुक्यांत घरफोडी आनी चोरयो वाडल्यात. थळाव्या लोकांनी ताची दखल घेतल्या. आश्वे, मोरजी, मांद्र्यां, हरमल वाठारांत जायत्यो घडणुको घडल्यात. अशाच एका घडणुकेंत पार्सेंतल्या 12 वर्सां पिरायेच्या भुरग्यान फाटल्या दारांतल्यान घरांत भितर घुसिल्ल्या चोराचेर दांड्यान हल्लो केले उपरांत चोर पळून गेलो. तो आपलें पाकिट थंय सोडून पळून गेलो. हे घडणुके उपरांत त्या भुरग्याच्या धाडशीपणाची तोखणाय करतना वाडट्यो चोरयेच्यो घडणूकी आनी घरफोडी प्रकरणा विशीं नागरिकांनी हुस्को उक्तायला.
पेडणेंतली चोरी, घरफोडी प्रकरणां
आंतरराज्य घरफोडी रॅकेट उक्ताडार : फाटल्या म्हयन्याच्या निमाणे कडेन पेडणें पुलिसांनी केरळ आनी कर्नाटकांतल्या तीग जाणांक अटक केली. दर्यादेगेवेल्या वाठारांतल्या पर्यटकांक लक्ष्य करून वेवसायीक कॅमेरे, मोबायल फोन, पयशे आनी हेर मोलादीक वस्तू चोरिल्ल्यो. पुलिसांनी तांचे कडल्यान गुन्यांवा खातीर वापरिल्ली गाडी सयत सुमार 25 लाखांचो चोरिल्लो म्हाल जप्त केल्लो.
पालये घरफोडी : पालयेंतल्या आनीक एका घडणुकेंत एका घरांतल्यान 2 लाखांचें भांगर आनी 22 हजार रुपया चोरून व्हेले. ह्या प्रकरणांत जी. म्हापसेकार आनी फिरोज मिरावाझ हांकां अटक केल्ली.
तेमवाडो, उगवे चोरी प्रकरण: उगवेच्या तेमवाडो वाठारांत घरफोडी जाल्ली. ह्या प्रकरणांत वसीम हुसेनसाब ताजअहमद आनी शंकर पवार उर्फ हद्या ह्या दोगांयचो आस्पाव आशिल्लो. दुसरे प्रकरणांत तांकां अटक केल्ली. ते उपरांत पेडणे पुलिसांनी दोगांयक ‘ट्रान्सफर वॉरंट’चेर ताब्यांत घेतले आनी फुडली कारवाय केली.
कोंडलवाड्यार दिसाउजवाडात दरोडो : जुलय 2025 वर्सा कोंडलवाड्यांत एका घरांत कोणूच ना ते पळोवन चोरी क्लेली. ह्या प्रकरणांत सुमार 4.5 लाख, भांगर आनी मोलादीक वस्तू चोरिल्ल्यो.
देवळांनी चोरीः पेडणें आनी तुयेंच्या जायत्या देवळांनी देणगी पेटी फोडून पयशे चोरपाच्यो घडणुको घडल्यो. ह्या प्रकरणांत महाराष्ट्रांतल्या मिथुन पवाराक विर्नोडाच्या एका देवळांत चोरीच्या प्रकरणांत अटक केल्ली. आनी चोरी केल्लो म्हाल जप्त केलो.
भुरग्यान चोराक धांवडायलो
सप्टेंबर 2025 वर्सा पेडणें पार्सेच्या 12 वर्सां पिरायेच्या भुरग्यान फाटल्या दारांतल्यान घरांत घुशिल्ल्या चोरचेर लांकडी दांड्यान हल्लो केलो. उपरांत चोर आपली पर्स थंयच सोडून पळून गेलो. पुलिसांच्या चवकशेंतल्यान हे चोरयेंत गोंया भायल्या चोरांचो आस्पाव आशिल्ल्याचें दिसून आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
