भांगरभूंय | प्रतिनिधी
उच्च न्यायलयाचो आदेश : तिळारी भूंय संपादन भरपाय प्रकरण
भांगरभूंय । प्रतिनिधी
पणजी : तिळारी प्रकल्पा खातीर 2013 त भूंय संपादनाची प्रक्रिया पुराय करून लेगीत भूंय पिडेस्त कुटुंबांक भरपाय दिवपाक कळाव केल्ल्या प्रकरणांत भूंय संपादनाचो आदेश जारी जायत सावन 12 भूंय संपादन अधिकाऱ्यां कडल्यान व्याजा सयत 9.36 लाखांची रकम वसूल करपाचे आदेश उच्च न्यायालयान राज्य सरकाराक दिल्यात.
तिळारी प्रकल्पा खातीर जमीन संपादीत करून लेगीत लुकसाण भरपाय मेळूंक नाशिल्ल्यान एकल्यान उच्च न्यायालयांत धांव घेतिल्ली. ह्या प्रकरणाचेर सुनावणी घेवन न्यायालयान भूंय संपादनाचो आदेश जारी जायत सावन ज्या 12 भूंय संपादन अधिकाऱ्यांनी तिळारी पाटबंधारेचें काम पळयलें, तांच्या कडल्यान व्याजा सयत 9.36 लाख रुपया वसूल करपाचे आदेश सरकाराक दिल्यात. मजगतीं, 2013 त सरकारान भूंय संपादनाची प्रक्रिया पुराय केल्ली. ह्या प्रकल्पा खातीर जांच्यो जमनी संपादीत केल्यात, तांची लुकसाण भरपाय थारावीत मुजतींत जिल्हो न्यायालयांत जमा करपाचे निर्देश लेगीत न्यायालयान दिल्ले. ही जापसालदारकी भूंय संपादन अधिकाऱ्यांचेर दिल्ली. पूण जमीन संपादनाची प्रक्रिया पुराय जायत सावन थंय बारा अधिकारी येवन गेले. तरी लेगीत एकाय जमीन धनयाक भरपाय मेळूंक ना. ताका लागून एका जमीन धनयान न्यायालयांत धांव घेतिल्ली. 12 अधिकाऱ्यांक वाटावपा खातीर सरकारान न्यायालयांत विनवणी याचिका दाखल केल्ली, पूण न्यायालयान ती भायर मारिल्ली.
वित्त सचिवान सादर केल्लो अहवाल
लुकसाण भरपाय मेळूंक नासिल्ल्या जमीन धनयान न्यायलयांत धांव घेतले उपरांत न्यायालयान वित्त सचिवाक ह्या प्रकरणाची चवकशी करपाचे तशेंच लुकसाण भरपाय दिवपाक कळाव केल्ल्या प्रकरणांत जापसालदारकी निश्चीत करपाचे आदेश दिल्ले. ते प्रमाण वित्त सचिवान 12 भूंय संपादन अधिकाऱ्यांच्या नांवा सयत अहवाल सादर केल्लो. मुख्य सचिवान ह्या 12 अधिकाऱ्यांक थाकाय दिवचे खातीर उच्च न्यायालयांत याचिकी दाखल केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
