भांगरभूंय | प्रतिनिधी
पणजीः भलायकी खात्या वतीन ‘स्वस्थ महिला, स्वस्थ गोंय’ हो उपक्रम गोंयांत हातांत घेतला. हाच्या खाला गोंयांतल्या 1 लाख 11 हजार 980 बायलांची थानांच्या कांक्रा खातीर तपासणी केली. ह्यो तपासण्यो दूख विरयत आयईबी पद्दतीन केल्यो. तातूंत 2294 बायलो कांक्रा खातीर दुबावीत सांपडल्यो, जाल्यार 58 जाणांक कांक्राची लागण जाल्या. भलायकी मंत्री विश्वजीत राणे हांणी सोशल मिडिया वयल्यान ही म्हायती दिल्या.
मुळाव्या तशेंच कम्युनिटी भलायकी केंद्रांत थानांच्या कांक्रा खातीर फुकट तपासणी करतात. ताका लागून कांक्राचीं लक्षणां बेगीन वळखून उपचार सुरू करप शक्य जालां. मुळाव्या पांवड्यार उपचार सुरू जाले जाल्यार दुयेंतीचो जीव वाटावप सोंपें जाता. आयईबी उपकरण हें दूख विरयत आनी रेडिएशन मुक्त आसा. ते खातीर तपासणेचो अहवाल तत्काळ मेळटा. ताचे वरवीं तपासणी करप सगळ्यां खातीर सोंपें आसा, अशें राणे हांणी म्हणलां.
सध्या भलायकी खात्या वतीन कांक्र जागृती सप्तक मनयतात. तातूंत कांक्रा विशीं विवीध पांवड्यार जागृताय करतात. हाचोच एक वांटो म्हूण ‘विजय उत्सव’ खाला थानांच्या कांक्रा पसून सुटका जाल्ल्यांचो भोवमान केलो. ह्या बायलांनी कांक्रा कडेन दिल्लो लढो हेर व्यक्ती खातीर प्रेरणा दिवपी थारतलो. गोंयांतले दरेके बायलेन भलायकी केंद्राक भेट दिवन फुकट तपासणी सेवेचो लाव घेवचो, असो उलो राणे हांणी मारला.
मेळिल्ले म्हायती प्रमाण गोंयांत ‘स्वस्थ महिला, स्वस्थ गोंय’ हो उपक्रम ऑक्टोबर 2021 त सुरू जाल्लो. तातूंत सुरवातीक दोन वर्सांच्या काळांत 1 लाख बायलांची तपासणी करपाचे आशिल्ले. ते उपरांत ह्या उपक्रमाचो काळ वाडयलो. तातूंत थानांच्या कांक्राचे तपासणे सयत हे विशीं जागृताय करप, शिक्षीत करप हांचोय आस्पाव आसा. ह्या उपक्रमांतल्यान गोंयांतल्या वट्ट 2.5 लाख बायलांची तपासणी करपाची मोख आसा. खात्या वतीन फेब्रुवारी सावन थानांच्या कांक्रा खातीरची म्हारग वखदां लेगीत फुकट दितात. जुलयांत जाल्ल्या लोकसभा अधिवेशनांतल्या प्रस्नाचे लेखी जापेंतल्यान मेळिल्ले म्हायती प्रमाण गोंयांत 2014 ते 2023 ह्या 10 वर्सांच्या काळांत म्हयन्याक सरासरी 8 बायलांक थानांच्या कांक्राक लागून मरण आयलां. वयल्या काळांत गोंयांत 1002 बायलांक थानांच्या कांक्राक लागून मरण आयलां. हातूंत 2023 त सगळ्यांत चड 110 बायलांक थानांच्या कांक्राक लागून मरण आयिल्लें. जाल्यार 2022 त 109, 2021 त 106 जाल्यार 2020 त 103 बायलांक थानांच्या कांक्राक लागून मरण आयिल्लें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
