भांगरभूंय | प्रतिनिधी
106 जखमी; वीज मंत्र्यांची लेखी जापेंतल्यान म्हायती
भांगरभूंय । प्रतिनिधी
म्हापशें: फाटल्या पांच वर्सांत काम करतना जाल्ल्या अपघातांनी वीज खात्याच्या 11 लायनमन आनी सहाय्यक लायनमन कर्मचाऱ्यांक मरण आयलां. जाल्यार 106 कर्मचारी जखमी जाल्यात. तातूंतल्या एका कर्मचाऱ्याक दिव्यांगत्व आयलां.
आमदार अॅड. कार्लुस आल्वारीस फेरेरा हांच्या प्रस्नाचेर वीज मंत्री सुदिन ढवळीकार हांणी हे विशीं लेखी जाप विधानसभेंत दिल्या.
2018 ते 2023 मेरेन काम करतना मरण आयिल्ल्या वीज कर्मचाऱ्यां मदीं देविदास वेळीप (वात्ते, नेतुर्ली), दिलीप आप्पा गांवकार (कालय सांगें), सगूण लक्ष्मण गांवस (कुर्टी) सुभाष अमेरकार (सुकेकुळण धारगळ), संजय आर. गांवकार (देवूळवाडो ठाणे), बाबू एम. गेळेकार (गांवकरवाडो नार्वे), गजानन एम. परब (तानोडीवाडो पिर्णा), उदय आर. नायक (मोरजी), लाडू सदानंद नायक आरोंदेकार (विर्नोडें पेडणें), कृष्णा पवार, लाडू पेडणेंकार हांचो आस्पाव आसा. तशेंच ऑगस्ट 2020 त बोरी फोंड्यां वीज खांबे व्हरपी ट्रक उमथून जाल्ल्या अपघातांत सगुण गांवस ह्या वीज कर्मचाऱ्या सयत दोग कंत्राटी कामदारांक मरण आयिल्लें. ह्या अपघाता भायर हेर वयल्या 10 कर्मचाऱ्यांक वीज खांब्या वयल्यान पडून वा विजेचो शॉक लागून मरण आयलां, अशें जापेंत म्हणलां.2018 ते जानेवारी 2024 मेरेनच्या पांच वर्सांच्या काळांत काम करतना वट्ट 106 वीज कर्मचारी जखमी जाल्यात. तशेंच बोरी फोंड्यां जंक्शना वयल्या अपघातांत आनीक तीन कंत्राटी कामगार जखमी जाल्ले.
ऑगस्ट 2023 त मुळगांवां काम करतना वीज लायनमन संदीप केरकार (अडवलपाल) हाका अपघात जाल्लो. तातूंत तांकां आपलो उजवो हात वगडावचो पडिल्लो. ताका लागून वीज खात्यान केरकार हांकां 7 लाख रुपया मजत म्हूण रकम दिल्ली, अशें लेखी जापेंत मंत्री सुदिन ढवळीकार हांणी नमूद केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
