भांगरभूंय | प्रतिनिधी
पुरातत्व मंत्री सुभाष फळदेसाय हांची लेखी जापेंत म्हायती
प्रतिनिधी । भांगरभूंय
पणजीः पुरातन देवळां आनी इतिहासीक थळांचे उदरगतीच्या कामांचेर पुरातत्व खात्यान फाटल्या पांच वर्सांच्यान 50.50 कोटी रुपया मोडल्यात. ते भायर खात्यान 7 इतिहासीक थळां संरक्षीत थळां म्हण अधिसुचीत केल्यांत, पूण तांच्या संवर्धना संबंदांत कसलेंच नियोजन तयार करुंक ना, अशें पुरातत्व खात्याचे मंत्री सुभाष फळदेसाय हांनी विधानसभेच्या लेखी जापेंत सांगलां.
मयेंचे आमदार प्रेमेंन्द्र शेट हांणी पुरातत्व खात्यान घेतिल्ल्या उदरगतीच्या कामांचो तपशील मागिल्लो. विधानसभेच्या पटलार मंत्री फळदेसाय हांणी म्हायती दितना म्हणलां, 2012 ते 2022 मेरेन पुरातत्व खात्यान 11 पुरातन थळांच्या उदरगतीचें काम हातांत घेतिल्लें. हे खातीर 47,50,52,395 रुपया खर्च अपेक्षीत आशिल्लो, पूण उपरांत हो खर्च वाडून टेंडरांत 50,49,19,203 रुपया खात्यान मोडल्यात. 11 मदलीं 9 कामां पुराय जाल्यांत जाल्यार 2 कामां चालू आसात.
2 जानेवारी 2012 ह्या दिसा वेर्णा साश्ट श्री महालसा देवी देवळाचे पुरातन सुवातीच् उदरगतीचें काम हातांत घेतिल्लें. पयल्या पांवड्यार 15,80,83,811 रुपया खर्च अपेक्षीत आसलो, पूण त्या कामाक 18,15,26,901 रुपया खर्च आयलो.
7 डिसेंबर 2016 ह्या दिसा ह्याच श्री महालसा देवीच्या देवळांच्या पुरातन सुवातेचे उदरगतीच्या कामाचो दुसरो पांवडो हातांत घंतलो. ह्या कामाक 13,49,87,464 रुपया खर्च अपेक्षीत आसलो, पूण 14,72,87,915 रुपया मोडून हें काम पुराय जालें.
5 डिसेंबर 2016 त शापोरा किल्ल्यार वचपाक सोंपाणांचें काम हातांत घेतिल्ले. ह्या कामांक 5,76,63,443 रुपया खर्च अपेक्षीत आसलो, पूण हाचो खर्च मात्सो देंवून 4,61,30,755 रुपया मेरेन पावलो.
21 मे 2020 ह्या दिसा पोरणें गोंय सेंट झेवियर ह्या कपेलाची देखरेख आनी पुनर्निर्माणाचें काम हातांत घेतिल्लें. ह्या कामा खातीर 37,02,888 रुपया खर्च अपेक्षीत आसलो, पूण 37,76,63,443 रुपया खर्च करून हें काम पुराय जालें.
13 मार्च 2018 त पेडणेंच्या हऴर्ण किल्ल्याचें पुनर्निर्माणांचें काम हातांत घेतिल्लें. ताका 64,52,419रुपया खर्च अपेक्षीत आसलो, पूण 67,24,535 रुपया खर्च करून हें काम पुराय जालें.
10 डिसेंबर 2020 त मुरगांव किल्ल्यार झिलीझोपां नितळ करपाचें काम हातांत घेतिल्लें. हे खातीर 4,18,918 रुपया खर्च अपेक्षीत आसलो, पूण ह्या कामाचो खर्च मात्सो उणो जावन 4,39,529 रुपया मेरेन पावलो.
1 ऑक्टोबर 2021 त पेडणेंच्या हळर्ण किल्ल्याच्या पुनर्निर्माणाच्या कामाचो दुसरो पांवडो हातांत घेतलो. ह्या कामा खातीर 27,38,831 रुपया खर्च अपेक्षीत आसलो. पूण ह्या कामाक 28,70,294 रुपया खर्च आयलो.
4 डिसेंबर 2018 त नार्वे दिवचल्या श्री सप्तकोटेश्वर देवळाच्या पुनर्निर्माण आनी संवर्धनाचें काम हातात घेतिल्लें. हे खातीर 5,03,05,267 रुपया खर्च अपेक्षीत आसलो, पूण 5,27,75,255 रुपया खर्च करून हें काम पुराय जालें.
तिसवाडी मोन्त इला सायबीणीच्या कपेलाचें पुनर्निर्माण आनी संवर्धनाचें काम 10 फेब्रुवारी 2022 त हातांत घेतिल्लें. ह्या कामाक 1,13,93,570 रुपया खर्च अपेक्षीत आसलो, पूण हाचो खर्च 1,17,35,377 रुपया मेरेन पावलो.
1 डिसेंबर 2021 त खोर्जुवें किल्ल्यांचें पुनर्निर्माण आनी संवर्धनाचें काम हातांत घेतिल्लें. ह्या कामाक 2,22,41,652 रुपया खर्च अपेक्षीत आसलो, पूण हो खर्च 2,33,42,614 रुपया मेरेन पावला.
सांखळी किल्ल्याचें पुनर्निर्माण आनी संवर्धनाचें काम 2 डिसेंबर 2021 त हातांत घेतिल्लें. 2,70,64,132 रुपया ह्या कामाक खर्च अपेक्षीत आसलो, पूण हो खर्च आतां 2,83,09,082 रुपयांचेर पावला. फक्त सांखळी आनी खोर्जुंवे किल्ल्याचें पुनर्निर्माण आनी संवर्धनाचीं कामां अजून चालू आसात, जाल्यार बाकीचीं उदरगतीचीं कामां पुराय जाल्यांत.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
