भांगरभूंय | प्रतिनिधी
म्हापशें: हणजूणें पुलिशेंतल्यान 3, डिटेंशन सेंटरांतल्यान 5, म्हापशें पुलिशेंतल्यान 1 जाल्यार दाबोळी पुलिशेचे तावडेंतल्यान एक कैदी पळून गेल्लो.
7 जून 2014 ह्या दिसा हणजूणें पुलीस कोठडेंतल्यान सावळे रामनाथ कोरगांवकार (रा. धारगळ पेडणें) आनी ओंकार मारुती पाटील (रा. सांताक्रूझ तिसवाडी) हे दोग पळून गेल्ले. पुलीस कोठडेंतल्यान शौचालयाचे वण्टीक बुराक मारून ते पळून गेल्ले. चोरयेच्या प्रकरणांत दुबावितांक अटक जाल्ली.
19 डिसेंबर 2019 ह्या दिसा मोबायल चोर राहूल मोंडल (रा. पश्चीम बंगाल) हो हणजूणें पुलिशेचे तावडेंतल्यान पळून गेल्लो. पर्यटकांचो मोबायल झोमून घेवपाच्या प्रकरणांत ताका अटक जाल्ली. हडफड्यां गुजरातांतल्या दुचाकी चालकाचो मोबायस झोमून घेवपाच्या प्रकरणांत ताका अटक जाल्ली. हडफड्यां गुजरातांतलो दुचाकी चालक पर्यटकाचो मोबायल चोरील्ल्या प्रकरणांत अटक केल्लो मुस्तफोर अली अस्सत मोल्ला आनी मिनूल सहीदूल मोल्ला ह्या दुबावितांक पुलिसांनी अटक केल्ली. ह्या दुबावितांनी दिल्ल्या म्हायतीच्या आदारान तांचो सांगाती राहूल मोंडल हाका अटक केल्ली.
11 ऑगस्ट 2024 ह्या दिसा मोहम्मद नमन हवासदेर, मोहम्मद हिलाल आनी मोहम्मद तोहेत मरिदा ह्या तीन बांगलादेशी नागरिकांनी म्हापशें डिटेंशन सेंटरांतल्यान फुज्ज्यो काडिल्ल्यो. 31 जानेवारी 2020 ह्या दिसा अमीनू कानू महम्मेद हाना हो नायजेरियन नागरीक जाल्यार 2 मार्च 2023 ह्या दिसा डिमिट्री आलेक्झांड्रोव्हा हो रशियन नागरीक डिटेंशन सेंटरांतल्यान पळून गेल्लो.
कोलवाळ बंदखणींतल्यान 25 ऑगस्ट 2020 ह्या दिसा कैदी हेमराज मौलाकरम भारद्वाज (रा. हिमाचल प्रदेश) पळून गेल्लो. जानेवारी 2020 त पेडणें पुलिसांनी ड्रग्स प्रकरणांत ताका अटक केल्ली. हो कैदी अजून पुलिसांक मेळूंक ना.
22 सप्टेंबर 2020 ह्या दिसा रामचंद्रम चेंडा येल्लाप्पा उर्फ रामचंद्रन (तामीळनाडी) हो कैदी बंदखणीचे सुरक्षा यंत्रणेची नदर चुकोवन पळून गेल्लो. ते उपरांत एप्रील 2021 त ताका हॉसकोट कर्नाटकांत अटक केल्ली. घोग्यांनी पडपी पावसाचो फायदो घेवन एका जेल गार्डाचो गणभेस घालून तो बंदखणींतल्यान बिनधास्त पळून गेल्लो. 2018 त पाळोळें काणकोणां दर्यादेगेर बिर्टीश बायलेचेर बलात्कार केल्ल्या प्रकरणांत रामचंद्रमाक अटक जाल्ली.
29 डिसेंबर 2020 ह्या दिसा कैदी विवेक कुमार गौतम (जयपूर राजस्थान) हाणें म्हापशें जिल्हो हॉस्पिटलाच्या वाठारांतल्यान फिल्मी स्टायलीन पळ काडिल्लो. भाव आनी घरकान्नीचे मजतीन पुलिसांचेर फारपेट करून तो पळून गेल्लो. मात मोरजेच्या एका गेस्ट हावसांतल्यान ताका परतून अटक केल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
