भांगरभूंय | प्रतिनिधी
झारखंड मुक्ती मोर्चाचो दावो, भाजपाचेर टिका
रांची, खबरां संस्था : झारखंड मुक्ती मोर्चा (जेएमएम) ह्या पक्षान भाजपा संबंदी एक दावो केला. तांच्या म्हणण्यां प्रमाण, फाटल्या 10 वर्सांच्या काळांत देशभरांतल्या हेर पक्षां मदले उणेच 740 खासदार, आमदारांनी भाजपांत प्रवेश केला. येवपी काळांत हो आंकडो आनीक वाडूं येता, अशेंय तांकां दिसता. जेएमएमाचे सरचिटणीस सुप्रियो भट्टाचार्य हांणी रांचींत ह्या मुद्या वयल्यान भाजपाचेर टिका केली.
भ्रश्टाचाराचो गंभीर आरोप केले उपरांत त्याच लोकांक भाजपान आपल्या पक्षांत प्रवेश दिवपाचें धोरण आपणायलां, असो आरोप विरोधक करतात. हे बाबतींत फाटल्या कांय म्हयन्यांत जाल्ल्या भाजपा प्रवेशाचीय देख विरोधी पक्ष दितात. फाटल्या कांय म्हयन्यांत काँग्रेस, शिवसेना, राष्ट्रवादी काँग्रेस सारक्या जायत्या विरोधी पक्षांतले फुडारी, आमदार आनी खासदार भाजपांत आयल्यात. ताचोच उल्लेख करून झारखंड मुक्ती मोर्चान भाजपा आड हो दावो केला.
‘2014 ते 2024 ह्या काळांत देशांत जायत्यो अजापाच्यो गजाली घडल्यात. कितें खावचें, कितें न्हेसचें, कितें अभ्यासचें, कितें आयकुचें ताच्यो लेगीत सुचोवण्यो आनी आदेश पक्षान वावुरप्यांक दिल्यात. सत्ताधाऱ्यांच्या मतान, विरोध करपी एकान एक मनीस भ्रश्ट आसात. भाजपांतले मात सगळेच धुविल्ल्या तांदळा सारके नितळ. सरकाराच्या धोरणांक विरोध करपी सगलेच भारतीय हे राष्ट्रविरोधी, अशें तांचें मत,’ अशें सुप्रियो भट्टाचार्य हांणी सांगलें.
धा वर्सांत कितले भाजपांत?
सुप्रियो हांचे पत्रकार परिशदे संबंदीची ही खबर पीटीआयन दिल्या. सुप्रियो हांच्या दाव्या प्रमाण, फाटल्या धा वर्सांत वट्ट 740 आमदार- खासदार विरोधी पक्षांतल्यान भाजपांत आयल्यात, अशी म्हायती मेळ्ळ्या. ‘फाटल्या 10 वर्सांत 740 खासदार- आमदार भाजपांत आयल्यात. हातूंतले चडशे वांगडी काँग्रेसीचे. विशेश म्हणल्यार ह्या सगळ्यांचेर भाजपान भ्रश्टाचाराचे प्रत्यक्ष वा अप्रत्यक्ष आरोप केल्ले. आतां हे लोक तांचे खूब आवडीचे जाल्यात’, असो थोमणो सुप्रियो हांणी भाजपाक मारलो.
माय वे आॅर हाय वे
मजगतीं, सुप्रियो भट्टाचार्यान हांणी भारतीय जनता पक्षान अहंकारी वृत्तीचें धोरण चालीक लावप सुरू केलां असो गंभीर आरोप केलो. भाजपान ‘माय वे ऑर हाय वे’ हें धोरण चालीक लायलां. झारखंड ही ताची बरी देख. ते म्हणटात, की आदिवासींचो सन्मान हो ताचे खातीर प्राधान्याची गजाल. पूण तांकां आदिवासी मुख्यमंत्री नाका. आदिवासी मुख्यमंत्री जालोच जाल्यार ताका बंदखणींत धाडटले”, अशी टिका सुप्रियो हांणी भाजपाचेर केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
