भांगरभूंय | प्रतिनिधी
केंद्रीय राज्यमंत्री डॉ. पेम्मासानी चंद्रशेखर हांची म्हायती
नवी दिल्ली, खबरां संस्था ः स्मार्टफोन, इंटरनॅट आनी सोशल मिडिया वरवीं देशांतल्या इंटरनॅट वापरप्यांचो आंकडो खूब वाडला. ते भायर स्मार्टफोनाचेर बँकींग, ऑनलायन शॉपिंग आनी हेर पद्दती सुरू जाल्ल्यान ही वाड चडूच जाली. फाटल्या धा वर्सांत देशांत इंटरनॅट वापरपी, टेलिफोन आनी मोबायल वापरपी लोकांचो आंकडो बरोच वाडला.
लोकसभा वांगडी कृष्णप्रसाद टेन्नेटी आनी वाय.एस. अविनाश रेड्डी हांणी लोकसभेंत सरकाराक देशांतल्या इंटरनॅट वापरप्यांचो आंकडो कितलो वाडलो हें विशीं कांय प्रस्न विचारिल्ले. तशेंच टेलिफोन आनी मोबायल वापरपी आनी इंटरनॅट, ब्रॉडबँड वापरप्यां मदीं जाल्ली वाड हें विशीं तपशील मागलो. ताचेर जाप दितना म्हायती प्रसार आनी ग्रामीण उदरगत राज्यमंत्री डॉ. पेम्मासानी चंद्रशेखर हांणी हे विशीं संसदेंत म्हायती दिली.
टेलिफोन कनेक्शन कितलें वाडले
ह्या प्रस्नाक जाप दितना मंत्री चंद्रशेखर हांणी सांगलें, 31 मार्च 2014 मेरेन देशांत टेलीफोन कनेक्शनाचो आंकडो 93.3 कोटी आशिल्लो, जाल्यार 31 मार्च 2024 मेरेन हो आंकडो 119.87 कोटी मेरेन पावलो. हांतूत वट्ट 28.48 टक्क्यांनी वाड जाल्या.
10 वर्सांत मोबायल कनेक्शन
31 मार्च 2014 मेरेन देशांत मोबायल वापरप्यांचो आंकडो 90.45 कोटी आसलो जाल्यार 31 मार्च 2024 मेरेन हो आंकडो 116.59 कोटींचेर पावलो. हांतूत 28.90 टक्क्यांनी वाड जाल्या. सरकाराच्या आंकडेवारी प्रमाण देशांत 31 मार्च 2014 मेरेन इंटरनॅट सबस्क्रिप्शन 25.16 कोटी आशिल्ले, जे 31 मार्च 2024 मेरेन 95.44 कोटी मेरेन पावले. हांतूत 279.33 टक्क्यांनी वाड जाल्या. जाल्यार ब्रॉडबँड सब्सक्रिप्शन 31 मार्च 2014 मेरेन 6.09 कोटी आशिल्ले. जें 31 मार्च 2024 मेरेन 92.41 कोटी जालें. म्हळ्यार फाटल्या धा वर्सांत हो आंकडो 1417.41 कोटी मेरेन वाडलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
