10 वर्सांत गाडयो वाडल्यो, अपघात अर्द्यान देंवले
भांगरभूंय | प्रतिनिधी
दिसाक सरासरी 226 गाडयांची नोंदणी, गोंयांत 13 लाख गाडयो
भांगरभूंय । प्रतिनिधी
पणजी : अपघाती मरणांचो वाडटो आंकडो हो हुस्क्याचो विशय आसलो तरी फाटल्या 10 वर्सांत अपघातांचें प्रमाण सुमार 50 टक्क्यांनी देवलां. गाडयांचो आंकडो मात वाडत आसा. दिसाक सरासरी 226 नव्या गाडयांची नोंदणी जाता. आयचे घडयेक गोंयांत 13 लाख गाडयो येरादारी करतात, अशी म्हायती येरादारी खात्या कडल्यान मेळ्ळी. अपघातांत मरण येवपाचें प्रमाण लेगीत उणें जालां, अशें आंकडेवारी पळयल्यार कळटा.
गोंयांत गाडयांचो आंकडो वाडत आसा. गाडयांचे नोंदणीची आंकडेवारी खात्या कडेन आसा. पोरण्यो गाडयो कावलांत वतात. तशेंच दर दिसा नव्या गाडयांची भर पडटा. हाका लागून गोंयांतल्या गाडयांचो नेमको आंकडो कळप कठीण आसा. तरी सध्याचे घडयेक गोंयांत 13 लाख गाडयो रस्त्यांचेर येरादारी करतात. भायल्यो गाडयो येतात. हाका लागून रस्त्यांचेर गाडयांचो ताण वाडत आसा, अशी म्हायती सहाय्यक येरादारी संचालक फ्रान्सीस वाझ हांणी दिली.
10 वर्सां पयलीं म्हणल्यार 2014 त 4229 अपघात जाल्ले आनी 290 जाणांक मरण आयिल्लें. अंदूं 2024 त (21 ऑक्टोबर मेरेन) 2098 अपघात जाल्यात आनी 226 जाणांक मरण आयलां. अपघातांचें प्रमाण 50 टक्के उणें आसा. तशेंच मरण येवप्यांचो आंकडो 64 न उणो आसा. 2024 सोंपपाक आनीक 2 म्हयने आसात. हाका लागून अपघातांचो आंकडो आनी मरणाचो आंकडो वाडपाची शक्यताय आसा.
2014 ते 2017 या चार वर्सांत अपघातांचो आंकडो चड आसलो आनी मरण येवप्यांचो आंकडो लेगीत चड आसलो. 2017 उपरांत अपघात तशेंच मरण येवप्यांचो आंकडो उणो जालो. 2014 त 4229 अपघातांत 290 जाणांक मरण आयलें. 2015 त 4338 अपघातांत 311 जाणांक मरण आयलें. 2016 त 4304 अपघातांत 336 जाणांक मरण आयलें. 2017 त 3917 अपघातांत 328 जाणांक मरण आयलें. 2014 ते 2016 ह्या तीन वर्सांत 4 हजारां परस चड अपघात जाल्यात. तशेंच 2015 ते 2017 ह्या तीन वर्सांत 300 परस चड लोकांक अपघातांत मरण आयलां. 2017 उपरांत अपघातांत मरण येवप्यांचो आंकडो 300 परस सकयल आसा. 2018 उपरांत अपघातांनी 4 हजारांचो आंकडो हुपूंक ना. 2023 त 2846 अपघात जावन 290 जाणांक मरण आयिल्लें.
गाडयांचो आंकडो मात वाडटा
गाडायांचो आंकडो मात वाडत आसा. अर्थीक वर्साच्या हिशेबान गाडयांची नोंदणी जाता. 2014 – 15 अर्थीक वर्सा 75,366 गाडयांची नोंदणी जाल्ली. 2023 – 2024 अर्थीक वर्सा 82,712 गाडयांची नोंदणी जाल्ली. सरासरीचो विचार केलो जाल्यार दिसाक 226 गाडयांची नोंदणी जाल्या. 10 वर्सां पयलीं म्हणल्यार 2014 – 2015 त 75,366 गाडयांची नोंदणी जाल्ली. 10 वर्सां पयलीं दिसाक 206 गाडयांची नोंदणी जाताली. आतां दिसाक 226 गाडयांची नोंदणी जाता. अंदूं 2024 – 25 त सप्टेंबर मेरेन 38,360 गाडयांची नोंदणी जाल्या.
नव्या गाडयांक लागून गाडयांचो आंकडो व्हड प्रमाणांत वाडत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
