भांगरभूंय | प्रतिनिधी
सभापती रमेश तवडकारः काणकोणां युवा मेळाव्याचें उक्तावण
भांगरभूंय । प्रतिनिधी
काणकोणः फुडल्या 10 वर्सांत काणकोणचो युवा निरशेल्लो, खंती दिसचो ना. तशेंच स्वताचें घर नाशिल्लें कुटुंब लेगीत काणकोणां आसचें ना. सरकारी नोकरे परस हेर मळांचेर तरणाट्यांक पर्याय दितले. फुडल्या 10 वर्सांत काणकोणची गिरेस्त म्हाल म्हूण देशांत मेजणी जातली, असो विस्वास काणकोणचे आमदार तशेंच सभापती रमेश तवडकार हांणी उक्तायलो.
आदर्शग्राम आमोण्यां लोकोत्सवाचें वारें मारपाक लागलां. ताचोच एक भाग म्हूण नियोजन आनी सांख्यिकी खात्या वतीन आत्मनिर्भर भारत आनी स्वयंपूर्ण गोंय ह्या माथाळ्या खाला विवीध खात्या वतीन येवजण्यांची म्हायती आनी त्या खात्या वतीन रोजगार निर्मिती हे संबंदांत युवा मेळाव्याचें आयोजन केल्लें. सभापती तवडकार हांणी ह्या मेळाव्याचें उक्तावण केलें. ह्या वेळार ते उलयताले.
उक्तावण सुवाळ्याक खेळां आनी युवा वेव्हार संचालनालयाचे संचालक अरविंद खुटकार, काणकोणचे उपजिल्होधिकारी मधू नार्वेंकार, मामलेदार मनोज कोरगांवकार, पैंगीणची सरपंच सविता तवडकार, खोतीगांवची सरपंच वृंदा वेळीप, श्रीस्थळची सरपंच सेजल गांवकार, शेतकी खात्याचे सहाय्यक संचालक नागेश कोमरपंत, सांख्यिकी खात्याचे गोखले, काणकोण भाजप मंडळाचे अध्यक्ष विशाल देसाय, सरचिटणीस दिवाकर पागी, आदर्श युवक संघाचे सचीव अशोक गांवकार, भांडारी गणेश गांवकार हाजीर आशिल्ले.
जांणी जांणी आपली संस्कृती सोडली, त्या देशाचें घट्टण जालें. संस्कृती तिगोवन दवरपाची जापसालदारकी युवा पिळगेन घेवची, अशें सभापती तवडकार हांणी सांगलें.
अरविंद खुटकार हांणी सांगलें, युवा आनी बायलांचें सक्षमीकरण जावचें ह्या उद्देसान दोन दिसांच्या मेळाव्याचें आयोजन केलां. 2015 त रमेश तवडकार हांणी खेळांमंत्री आसतना युवा धोरण थारायिल्लें, ताचो तांणी उगडास करून दिलो.
स्वयंपूर्ण मित्र ह्या नात्यान गांवची उदरगत कशी करपाक जाता, गांवच्यो समस्या कश्यो सोडोवपाक मेळटा, हे संबंदांत ह्या वेळार मधू नार्वेंकार हांणी आपले अणभव सांगलें.
भालचंद्र आमोणकार आनी हेर मानेस्तांनी विवीध खात्यांच्या येवजण्यांची म्हायती दिली. सविता तवडकार हांणी उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
