भांगरभूंय | प्रतिनिधी
तुमच्या शारिरीक आनी मानसीक भलायके खातीर सक्रीय रावप खूब म्हत्वाचें. हे सक्रीय जिणे पद्दतीक लागून जायते रोग जावंक शकतात. हे विशीं अभ्यास केलो तेन्ना कळ्ळें, एकेच सुवातेर 10 वरां परस चड वेळ बसल्यार डिमेंशियाचो धोको वाडटा. हो रोग न्हय तर न्युरोडीजनरेटिव्ह स्थिती जावन आसा.
JAMA जर्नलांत सप्टेंबरांत प्रकाशीत जाल्ल्या एका अभ्यासांत 60 आनी ताचे परस चड पिरायेच्या सुमार 50 हजार प्रौढांचें विश्लेशण केलें. बसून रावप डिमेंशियाचो धोको वाडोवपाक शकता. जे लोक दिसांतल्यान 10 वरां वा ताचे परस चड वेळ बसतात तांकां स्मृतिभ्रंश जावपाचो धोको वाडटा.
हे विशीं तज्ज्ञ सांगतात, याददाश वचपाक मेमरी लॉस म्हणटात. याददाश वचपाचीं जायतीं कारणां जावपाक शकतात.
आजकाल कामाक लागून दरेकले एकेच सुवातेर स्क्रिनी मुखार बसून वरांचीं वरां घालयतात. ताका लागून हो धोको आनीक वाडटा. अशे परिस्थितींत जायती गजाली लक्षांत दवरप गरजेचें.
एक ल्हानसो ब्रेक घेयात
दिसभर एकेच सुवातेर बसचें पडल्यार थोडो वेळ काडून भोंवपाची संवय करात. कांय मिण्टां चलल्यार वा ताणून बसल्यार अस्वस्थताय उणी जावंक शकता. एरोबीक व्यायाम मेंदवाक बरो थारूंक शकता. तशेंच वेगान चलप, पेंवप आनी सायकल चलोवप हांचो आस्पाव करूं येता.
एका संशोधनांत अशें कळ्ळां, क्रॉसवर्ड आनी बुद्धीबळ खेळिल्ल्यान जाण्ट्यां मदीं याद वचपाचो धोको ११ टक्क्यांनी उणो जाता.
शक्य आसल्यार, सकाळीं बेगीन उठात आनी ध्यानाखातीर वेळ काडात. तें आमच्या मानसीक आनी शरिरीक भलायके खातीर बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
