भांगरभूंय | प्रतिनिधी
केनिया, खबरां संस्थाः भारतीय मूळच्या कावळ्यांक लागून केनियाक धक्को बसला. फुडल्या स म्हयन्यांत ह्या देशांत सुमार 10 लाख भारतीय कावळ्यांक मारतले. केनियांत कावळ्यांचो त्रास वाडला. शेतकी, हॉटेल आनी पर्यटन वेवसायाचेर परिणाम जावपी कावळ्यांचो आंकडो वाडत आशिल्ल्यान हो निर्णय घेतला अशें सांगतात.
केनिया सरकारान कावळ्यां आड एके तरेचें झूज केलां. ह्या वर्साचे अखेरेक देशांतले सुमार 10 लाख कावळ्यांक मारपाचें लक्ष्य सरकारान दवरलां. केनियाच्या पर्यावरण सांखळेंत भारतीय कावळ्यांक तितलें म्हत्व ना अशें केनिया सरकारान सांगलां. केनियम वाईल्डलाईफ सर्व्हिसांत भारतीय कावळो हें एक परदेशी सवणें. तो मूळ केनियाचो न्हय. देखून केनिया सरकारान फुडल्या कांय म्हयन्यांत 10 लाख कावळ्यांक मारपाचो निर्णय घेतला.
केनियांत येवपी पर्यटकांक भारतीय कावळ्यांचो त्रास जावपाक लागला. हाचो परिणाम हॉटेलकारांकूय जाता. पर्यटक हॉटेलांत जेवतात तेन्ना हे कावळे तांकां अडचणींत घालतात. जेवणाच्या सोदांत ह्या कावळ्यांक लागून पर्यटक अस्वस्थ जातात अशी कागाळ केनियांतल्या हॉटेलकारांची आसा. तशेंच नव्यान वाडिल्लीं पिकां आनी कोंबयेचीं पिलां हें ह्या कावळ्याचें अन्न. देखून ही पिलां कावळ्यांचो शिकार जावचीं न्हय म्हणून आमकां कितलेशेच म्हयने सादूर रावून राखण करची पडटा. आमी जतनाय घेना जाल्यार हें कावळे दिसाक सुमार 20 पिलां व्हरतात.
ह्या कारणाक लागून व्हड अर्थीक लुकसाण जावपाची शक्यताय मतींत घेवन केनिया सरकारान हो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
